El Salón Internacional de les Sidres de Gala va aconceyar del 24 al 27 de setiembre a 107 productores d’Europa, América y Asia, frente a los 63 que participaron na edición anterior. 

La organización abrió agora una campaña de captación de voluntaries y voluntarios pa collaborar nel desarrollu del eventu.

El Salón Internacional de les Sidres de Gala (SISGA’26) pieslló la so fase d’inscripción con 107 productores sidreros procedentes d’Europa, América y Asia, una cifra que confirma’l xorrecimientu internacional d’un eventu que va celebrar la so 16.ª edición del 24 al 27 de setiembre n’Asturies.

El datu supón un saltu considerable frente a la edición de 2025, na que participaron 63 productores que presentaron más de doscientos productos. Esti añu, la presencia de más d’un centenar de llagares consolida al SISGA como ún de los principales espacios d’alcuentru del sector sidreru internacional y vuelve allugar Asturies como referencia pa productores y cultures sidreres procedentes de distintes partes del mundiu.

Cola inscripción de productores yá piesllada, la organización abrió agora una campaña de captación de voluntaries y voluntarios pa collaborar nel desarrollu del eventu.

Les xeres van dende l’acreditación y recepción de participantes hasta l’atención al públicu, el sofitu na Tastia Abierta, l’acompañamientu de productores internacionales, la organización de visites y presentaciones o los trabayos de comunicación, fotografía, videu, redes sociales y lloxística. Ún de los principales atractivos d’esti voluntariáu ye la posibilidá de vivir dende dientro un alcuentru internacional que va traer a Asturies a productores y profesionales de tres continentes, y conocer directamente a estes persones, conociendo estremaes formes d’ellaborar y entender la sidre, mui distintes de la tradición asturiana.

Nun ye necesaria esperiencia previa nin conocimientos especializaos sobre sidre, anque la organización va valorar especialmente’l conocimientu d’idiomes pola elevada presencia de participantes internacionales.

El voluntariáu puede collaborar durante tol SISGA o escoyer determinaos díes y turnos según la so disponibilidá. La mayor necesidá de personal va concentrase’l sábadu 26, coincidiendo cola Tastia Abierta al Públicu.

Les persones participantes van contar con acreditación, material de trabayu, certificáu de collaboración, seguru d’accidentes, comíes según los turnos y desplazamientos organizaos cuando les actividaes lo riquieran.

Les inscripciones pal voluntariáu y la información sobre’l programa pueden consultase na web oficial sisga.info.

El SISGA nun ye namás un concursu o una feria comercial. El certame nació como un espaciu dedicáu a la sidre de calidá y a la diversidá de cultures sidreres, combinando actividaes profesionales, tasties, intercambiu d’esperiencies ente productores y actos abiertos al públicu. 

El programa va desarrollase principalmente ente Xixón, Villaviciosa y Nava, combinando actividaes profesionales con actos abiertos al públicu.

El xueves 24 de setiembre van entamar les visites y alcuentros profesionales. El vienres 25 va reunise’l Xuráu Internacional de los Premios SISGA, coincidiendo cola Asamblea Añal de Cider Cities, la rede internacional de ciudaes vinculaes a la cultura sidrera.

Un de los momentos centrales va llegar el sábadu 26 cola Tastia Abierta al Públicu, que va celebrase nel Palaciu de Congresos del Recintu Ferial Luis Adaro de Xixón. Va ser la principal oportunidá pal públicu pa conocer directamente una parte importante de les sidres presentes nel certame y falar colos sos productores. Allí podrán prebase sidres brut, semiseques, de xelu, de fuéu, de saborgos, de pera y munches otres variedaes de sidres non escanciables. 

El programa va piesllase’l domingu 27 col Brunch de Gala y la entrega de los Premios SISGA, onde se van facer públicos los resultaos de les valoraciones realizaes pol xuráu internacional.

Estos premios constitúin ún de los principales elementos del Salón, al poner frente a frente productos procedentes de tradiciones sidreres mui distintes y permitir una comparación internacional ente estilos, métodos d’ellaboración y formes d’entender la sidre.

This work is licensed under a Creative Commons Attribution 4.0 International License.