Asturies algama los 408.400 cotizantes n’agostu, pero tol emplegu que medró nel últimu mes ye temporal y concéntrase nos servicios. La hostelería encabeza la creación de puestos nun branu nel que, pesi a los anuncios de “récords turísticos”, la rentabilidá hotelera cayó un 6,11% en xunetu.
Asturies preslló agostu con 408.400 persones cotizantes a la Seguridá Social, 2.138 más que nel mes anterior y la cifra más alta pa un mes d’agostu dende 2008. El problema apaez cuando se mira qué emplegu se ta creando y qué trabayu ta desapaeciendo.
Nel caberu mes namás medró l’afiliación de persones con contratu temporal. Esti colectivu aumentó un 4,8% y la temporalidá volvió xubir hasta representar el 17% de les persones afiliaes con contratu. Al mesmu tiempu, tol incrementu de puestos de trabayu concentróse nel sector servicios y foi la hostelería la que más tiró d’él, con 863 cotizantes nuevos nun solu mes.
Pa CCOO d’Asturies, los datos confirmen un cambiu de tendencia que va más allá de les oscilaciones normales del branu. La responsable d’Emplegu del sindicatu, Lucía Montejo, alvierte de que Asturies ta “sustituyendo trabajos estables y de calidad por empleos eventuales y precarios”.
Hai apenas un mes, los datos de la EPA yá amosaben que Asturies perdió 7.300 emplegos industriales nun añu. La cayida industrial producíase al tiempu que la ocupación recuperada se concentraba n’actividaes con fuerte componente estacional, especialmente hostelería y turismu.
La sustitución nun ye neutra. L’emplegu industrial tien, de media, mayor estabilidá, cualificación y capacidá salarial y arrastra actividá n’empreses auxiliares, tresporte, servicios técnicos y otros sectores. Bona parte del trabayu turísticu, pela contra, concéntrase durante unos meses, ta mal pagao, depende directamente de la temporada y presenta mayor rotación.
Los datos d’agostu vuelven confirmar esi desplazamientu: medra la hostelería y xorrez la temporalidá al mesmu tiempu.
Tener emplegu nun significa necesariamente disponer d’ingresos suficientes, estabilidá nin posibilidá de construyir un proyectu de vida: una de cada cuatro persones inscrites como demandantes d’emplegu yá tien trabayu y busca otru, una señal de que la cuestión llaboral asturiana nun pue midise únicamente col númberu de persones afiliaes.
Esta tresformación económica podría defendese dende dalgunos sectores al traviés d’una perspectiva estrictamente económica, si’l turismu tuviere xenerando un aumentu extraordinariu de riqueza y rentabilidá. Pero los últimos datos disponibles tampoco caltienen esi discursu ensin matices.
A lo llargo del branu, el Gobiernu del Principáu presentó repetidamente les cifres turístiques en términos de “récord”, “fortaleza” o “crecimientu”. El 31 d’agostu anunció qu’Asturies algamare en xunetu 440.354 visitantes y 1.260.008 pernoctaciones.
Pero la fotografía cambia enforma cuando se mira’l sector hoteleru por separao y, sobre manera, cuando se pasa de contar persones a contar ingresos.
Los hoteles asturianos tuvieron en xunetu un 0,53% menos de viaxeros y un 1,65% menos de pernoctaciones que nel mesmu mes del añu anterior. Fueron 251.471 clientes y 536.855 nueches, casi 16.500 pernoctaciones menos que nel xunetu de 2025.
La tarifa media diaria xubió un 6,31%, hasta los 105,42 euros. Ello ye: durmir nun hotel asturianu salió más caro. Pero l’ingresu por habitación disponible (RevPAR) —un indicador fundamental pa conocer la rentabilidá efectiva porque incorpora la ocupación— cayó un 6,11%, hasta los 66,52 euros.
El problema de fondu vuelve ser el modelu. Si la economía asturiana pierde emplegu industrial y estable y recupera ocupación al traviés de contratos temporales na hostelería, nun basta con celebrar que la cifra total d’afiliación medra.
Muncho menos si’l sector que xustifica esa transformación económica tampoco amuesa una rentabilidá proporcional a la presión que soporten el territoriu, la vivienda, les infraestructures y los servicios públicos.
El balance d’esti branu dexa asina una contradicción difícil d’ignorar: más dependencia del turismu, más temporalidá y menos emplegu industrial, al tiempu que la rentabilidá hotelera cae nel corazón de la temporada alta.
Asturies suma cotizantes y pierde, al empar, calidá nel emplegu y capacidá productiva.
This work is licensed under a Creative Commons Attribution 4.0 International License.
