La concentración contra’l racismu, la xenofobia y la violencia facista convocada pa esti miércoles 2 de setiembre en Xixón va celebrase finalmente na Plaza del Marqués, a les 20:00 hores. La organización decidió camudar l’allugamientu tres recibir menacies d’agresión por parte de la estrema drecha española, priorizando la seguridá de les persones participantes y, especialmente, de les que puedan atopase nuna situación de mayor vulnerabilidá.

La movilización, anunciada inicialmente dientro de les concentraciones antirracistes convocaes en Xixón y Llangréu, taba prevista en Xixón na Plaza Conceyu, coincidiendo a les 20:00 hores cola concentración na que’l PP anunciara la so participación na Plaza Mayor.

Agora, ante les menacies recibíes en relación cola convocatoria, los colectivos organizadores decidieron treslladala a la Plaza del Marqués, ensin modificar nin la hora nin el sen de la protesta.

«Nun cambiamos porque tengamos mieu nin porque renunciemos al nuesu drechu a ocupar l’espaciu públicu», dexen claro. La decisión, espliquen, respuende a una «responsabilidá colectiva» pa garantizar la seguridá de toles persones que quieran participar.

La organización insiste nel carácter non violentu de la convocatoria y recuerda que l’oxetivu ye salir a la cai pa defender los Drechos Humanos, la convivencia y el drechu a migrar de forma segura, denunciar el racismu y la xenofobia y evitar que los discursos d’odiu pretendan falar en nome del conxuntu de la sociedá.

«Sabemos que non toles partes entienden la movilización de la mesma manera. Nós nun vamos responder a les amenaces con más violencia. Vamos responder tando xuntes, organizaes y ocupando l’espaciu públicu dende l’antirracismu», señalen.

El cambiu d’allugamientu pretende precisamente evitar que les amenaces puedan condicionar quién tien drechu a manifestase. «Cambiar el llugar nun cambia’l nuesu propósitu. Seguimos alantre», recalquen.

Los convocantes piden amás que, a partir d’agora, s’esparda únicamente la nueva ubicación y que nun se compartan informaciones que puedan facilitar situaciones de riesgu.

La convocatoria de Llangréu sigue anunciada a les 20:00 hores na Plaza Conceyu.

Nueva ubicación en Xixón

Miércoles, 2 de setiembre
20:00 hores
Plaza del Marqués – Xixón

This work is licensed under a Creative Commons Attribution 4.0 International License.