Les concentraciones antirracistes convocaes pa esti miércoles 2 de setiembre van celebrase a les 20:00 hores, coincidiendo cola hora marcada pola FEMP pa los actos de «solidaridá con Ceuta». En Xixón, onde’l PP confirmó la so participación na concentración de la Plaza Mayor, la coincidencia de movilizaciones de signu enfrentáu fai prever una tarde especialmente tensa, especialmente tres les amenaces vertíes en rede por partidarios de “Ceuta y la unidá d’España”

La crisis abierta en Ceuta fae rescamplar la escalada de les ideoloxies facistes en tol territoriu estatal, incluyendo Asturies.

Esa fola de facismu y  racismu va tener esti miércoles una respuesta nes cais asturianes. Xixón y Llangréu van acoyer a les 20:00 hores concentraciones contra’l racismu, la xenofobia y la violencia exercida sobre les persones migrantes, como respuesta a la campaña de movilizaciones promovida pol PP y VOX utilizando fraudulentamente’l nome de la “Federación Española de Municipios y Provincias” y a la utilización política por parte de la derecha y la extrema derecha española de la situación na ciudá norteafricana.

La coincidencia nun ye casual. La presidenta de la FEMP, María José García-Pelayo, alcaldesa popular de Jerez, anunció’l pasáu 25 d’agostu concentraciones ante los conceyos de tol Estáu pal 2 de setiembre, Día de Ceuta, a les ocho de la tarde. 

La convocatoria nació marcada pola polémica. Tolos grupos políticos representaos nos órganos de la FEMP, sacante’l PP, denunciaron que García-Pelayo tomó estes decisiones ensin someteles a los órganos de gobiernu nin buscar alcuerdu col restu de formaciones denunciando que la presidenta actuó de manera unilateral y acusandol PP de facer un usu partidista de la Federación.

En Xixón, el Partíu Popular confirmó que va participar na concentración de les 20:00 hores ante’l Conceyu, na Plaza Mayor. El presidente llocal del PP, Andrés Ruiz, llamó a militantes, simpatizantes y ciudadanía a participar nun actu que presenta como una defensa de la solidaridá con Ceuta, la integridá territorial y la seguridá de les fronteres.

El PSOE de Xixón, pela so parte, anunció que nun va secundar la convocatoria y acusó a la derecha de buscar la polarización y d’utilizar políticamente la crisis humanitaria.

Frente a esa movilización, colectivos antirracistes y antifascistes llamaron a concentrase tamién a les ocho de la tarde, denunciando lo que consideren una campaña de criminalización colectiva de les persones migrantes y reclamando una respuesta basada nos derechos humanos.

En Llangréu ta anunciada igualmente una concentración antirracista a les 20:00 hores, dientro d’una respuesta que nun se llenda a Asturies. Movilizaciones asemeyaes tán convocándose n’otros puntos del Estáu; en Madrid, por exemplu, el Sindicato de Estudiantes llamó a concentrase a la mesma hora contra la violencia fascista y el discursu xenófobu alredor de Ceuta.

Les contra-convocatories tienen como telón de fondu los graves episodios vivíos estos últimos díes en Ceuta. El 27 d’agostu, grupos de manifestantes entraron en zones onde dormíen persones migrantes, destrozaron y quemaron instalaciones y pertenencies y llegaron a impedir el pasu d’un vehículu de Cruz Roja que llevaba ayuda humanitaria. RTVE documentó los incendios.

Les organizaciones que promueven les movilizaciones antirracistes falen de violencia fascista, calificando los ataques a los campamentos como un pogromu. Tamién cuestionen la respuesta de les fuerces policiales y denuncien que nun actuaron pa protexer a les persones acampaes. 

La tensión vien acompañada d’un aumentu del discursu xenófobu y de la presencia de grupos radicales. El propiu Ministeriu del Interior atribuyó parte de la escalada a discursos de la ultraderecha y denunció l’usu de términos como «invasores» o llamamientos a «cazar inmigrantes». Al empar, organizaciones vecinales de la propia Ceuta llamaron a evitar la violencia y alertaron de grupos que taben buscando migrantes pa agredilos.

La disputa nun ye simplemente sobre si Asturies o los conceyos tienen que mostrar solidaridá cola población de Ceuta. El conflictu ye qué significa esa solidaridá y quién define’l mensaxe. La crisis nun puede convertise nuna escusa pa normalizar discursos racistes nin pa señalar como enemigos a miles de persones que se topen nuna situación humanitaria estremadamente precaria.

This work is licensed under a Creative Commons Attribution 4.0 International License.