L’autodetermín comu drechu innegable al frente del manifestamientu al qu’acudieron unes 400 persones, que percorrieron esti domingu’l Muru de San Llorienzu, en Xixón, convocaos pola Asociación Asturiana de Solidaridá col Pueblu Saharaui y CEAS-Sáhara baxo’l lema «Paz y Xusticia pal Pueblu Saharaui». La marcha salió del Puentel Piles y acabó nos Xardinos del Náuticu, reclamando la descolonización del Sáḥara Occidental y el drechu del so pueblu a decidir el futuru al traviés d’un referendu
La revindicación llega 50 años dempués de la salida d’España del territoriu y vuelve poner enriba la mesa la responsabilidá histórica española. Tamién recuerda’l fracasu d’un procesu internacional ensin resolver: la ONU creó en 1991 la MINURSO —Misión de les Naciones Xuníes pal Referendu del Sáḥara Occidental— precisamente pa preparar una consulta na que la población saharaui pudiera escoyer ente la independencia y la integración en Marruecos. Más de 35 años dempués, esi referendu sigue ensin celebrase.
La movilización produzse amás nuna selmana marcada por nueves controversies venceyaes al conflictu. Orange Marruecos comprometióse a retirar una valla publicitaria na AP-7 que presentaba’l Sáḥara Occidental integráu nel mapa de Marruecos, dempués de la protesta formal del Frente Polisariu.
Pela so parte, el Colectivu de Defensores Saharauis de los Drechos Humanos (CODESA) denunció’l 26 d’agostu’l proyectu mineru TitanBeach, dedicáu a la esplotación d’arenes costeres riques en minerales pesaos y titaniu ente Tan-Tan y Tarfaya. CODESA considera que proyectos d’esti tipu contribúin a consolidar intereses económicos venceyaos a la ocupación y reclama que les empreses implicaes respeten el derechu internacional y el derechu del pueblu saharaui a l’autodeterminación.
El manifestamientu tuvo unos protagonistes especiales: los 87 neños y neñes saharauis del programa Vacaciones en Paz que siguen n’Asturies. Tres pasar casi dos meses con families asturianes, el próximu 3 de setiembre van volver a los campamentos de población refuxada de Tinduf.
Son, al empar, neños y embaxadores involuntarios d’un pueblu que lleva mediu sieglu estremáu ente los campamentos de refuxaos, los territorios controlaos por Marruecos y la diáspora. La so presencia na manifestación convierte la tradicional despedida de Vacaciones en Paz nuna llamada a que la solidaridá nun termine cuando l’avión vuelva pal desiertu.
La fecha de la movilización tuvo esti añu un significáu añadíu. El 30 d’agostu ye’l Día Internacional de les Víctimes de Desapaiciones Forciaes, establecíu poles Naciones Xuníes.
Nel casu saharaui, esa memoria sigue abierta. En 2015, el xuez Pablo Ruz, de l’Audiencia Nacional, procesó a once altos cargos marroquinos por crímenes cometíos contra población saharaui ente 1975 y 1992 y consideró que los fechos investigaos reuníen los requisitos pa ser tipificaos como delitu de xenocidiu. Nun foi una sentencia condergatoria, pero sí un auto de procesamientu d’una enorme relevancia.
Investigaciones como El oasis de la memoria, de Carlos Martín Beristain y Eloísa González Hidalgo, documentaron bombardeos, desplazamientos, tortures, asesinatos y desapaiciones forciaes sufríes pola población saharaui dende 1975.
Cincuenta años dempués, la reivindicación que percorrió esti domingu Xixón continúa siendo sorprendentemente cenciella: cumplir el drechu internacional, acabar cola descolonización pendiente y dexar que’l Pueblu Saharaui decida llibremente’l so futuru.
Paz y xusticia pal Pueblu Saharaui.
Más sobre esti tema
- Concentración en defensa del Pueblu Saharaui
- Carreño cola RASD: 50 años d’institucionalidá y memoria solidaria
This work is licensed under a Creative Commons Attribution 4.0 International License.
