La Escuela de Comerciu acueye dende güei y hasta’l 4 de setiembre una nueva edición de la Muestra de Cine Lésbicu d’Asturies, con entrada de baldre, cuatro llargumetraxes y una sección internacional de curtios que va permitir per primer vegada que’l públicu escueya la obra ganadora.
Xixón conviértese dende esti llunes nun espaciu pa visibilizar al traviés del cine les distintes realidaes de les muyeres lesbianes cola celebración de la V Muestra de Cine Lésbicu d’Asturies, que va tener llugar na Escuela Comerciu hasta’l próximu vienres 4 de setiembre.
La programación, entamada pola Asociación Cultura y Diversidad y la Sociedad Cultural Gesto, inclúi cuatro llargumetraxes y siete curtios internacionales, con proyecciones en versión orixinal subtitulada y encuentros abiertos col públicu. Les sesiones entamen a les 18:00 hores y l’accesu ye llibre hasta completar aforu.
La edición d’esti añu pon el focu en cuestiones como la identidá, el deséu, la maternidá, la emigración, la relación ente homosexualidá y relixón o les denominaes terapies de conversión, al traviés de películes realizaes dende distintos países y contestos sociales.
La Petite Dernière abre güei la muestra
La programación escomienza esti llunes cola proyección de La Petite Dernière, de la directora francesa Hafsia Herzi.
La película cuenta la historia de Fatima, una moza de 17 años criada nuna familia franco-arxelina musulmana qu’empcipia los sos estudios de Filosofía en París. El cambéu d’ambiente y el descubrimientu de la so atracción poles muyeres fáenla enfrentase a les contradicciones ente la fe, la familia, la identidá y los sos propios deseos.
La cinta compitió nel Festival de Cannes del 2025 y la so protagonista, Nadia Melliti, recibió’l premiu a la meyor interpretación femenina pola so actuación como Fatima.
La programación sigue mañana martes con Montreal, ma belle, de Xiaodan He, y el miércoles 2 cola francesa Love Me Tender, d’Anna Cazenave Cambet.
Esta postrer película yá tien una vinculación especial con Xixón: nel Festival Internacional de Cine de Xixón del 2025 recibió’l Premiu CIMA al Meyor Llargumetraxe dirixíu por una muyer. La cinta aborda la historia d’una madre que ve cómo camuda radicalmente la so vida dempués de comunicar al so exmaríu que caltién relaciones amoroses con muyeres.
El públicu va escoyer el meyor curtiu
Una de les principales novedaes d’esta quinta edición llega’l xueves 3 de setiembre, cola primer sección competitiva de curtios internacionales.
Van proyectase siete trabayos procedentes de Países Baxos, Brasil, Nueva Zelanda, Suiza, Arxentina y Francia: Iris, Instruções para destruir um Armário, Joey’s Heart, Due volte, Aracnidas, L’attente y Un corps brûlant.
Per primer vegada na historia de la muestra, van ser les persones asistentes les encargaes d’escoyer por votación popular el meyor curtiumetraxe.
La V Muestra de Cine Lésbicu d’Asturies va pesllase’l vienres 4 con The Miseducation of Cameron Post, de Desiree Akhavan, una película centrada nes llamaes terapies de conversión a les que ye sometida una adolescente nos Estaos Xuníos de los años noventa.
La obra recibió nel 2018 el Gran Premiu del Xuráu de Sundance na categoría de cine dramáticu estadounidense, ún de los principales reconocimientos del festival.
Con esta quinta edición, la muestra consolida en Xixón un espaciu audiovisual dedicáu específicamente a histories y esperiencies de muyeres lesbianes, combinando cine contemporaneu, diversidá cultural y debates sobre drechos, llibertá sexual ya identidá.
This work is licensed under a Creative Commons Attribution 4.0 International License.
