Esti añu, la programación del ciclu de cine del Festival Intercélticu de Lorient acueye apuestes peranovadores sobre les llingües minorizaes.
El Festival Interceltique de Lorient -An Oriant-, que va sumando 55 ediciones cola presente, dedícase esti añu a una de les naciones celtes menos conocíes y más pequeñes, Cornualles. El país, cuna del rei Arturu, cuenta con una de les tradiciones orales más riques del archipiélagu británicu anque, por mor del colonialismu inglés, la so llingua tuvo a piques de desapaecer.
Fízolo, de fechu, per casi un sieglu; sicasí, dende va delles décades, hai un movimientu de recuperación qu’algamó que, lo que paecía muerto y enterrao, tornara a ganar puxu y tea, anguaño, incorporándose al sistema educativu. Una de les apuestes pal ciclu de cine del festival de Lorient esti añu foi, precisamente, la proyeición de retratos de persones bretofalantes d’otres naciones celtes que falaran, amás de la llingua propia de Bretaña, la llingua britónica del so país. Asina, amosaron el casu de Kenneth J. George con Bev, Ken George (2025), creador del Kernewek Kemmyn, una variación de la ortografía del córnicu que ye más fiel a la fonoloxía que la propuesta xunificada. Demientres 15 minutos desplicó cómo deprendió la llingua como una manera de reclamar y reafirmar la so nacionalidá, la conexón col bretón, y cómo espoxiga la llingua cornuallesa nos conceyos de bardos, nel ámbitu públicu y na sociedá, partiendo de la so propia familia.
Dempués foi’l turnu del llargumetraxe de Marta Lallana, Muyeres (2023), sobre la tradición oral del suroccidente asturianu a partir de dos de los nomes más reconocíos de la tradición oral asturiana, a la manera d’un documental ficcionalizáu sobre l’abandonu de lo rural, la sostitución de la familia nos cuidaos pola migración interior y esterior, y los cambios sociolóxicos del trabayu n’andecha. La película introduz a les persones interesaes en gran parte de los elementos que componen la cultura asturiana anguañu: llingua llariega, mestizax, alcuentru y abandonu. L’apuesta de Lallana cuntó colos aportes del Archivu de la Tradición Oral d’Ambás, Rodrigo Cuevas y el productor Raul Refree.
Otros de los títulos incluyíos nel festival son Rondallas (2025), de Galicia; Les Ramoneurs de Menhirs en lutte et en fête (2025), de Bretaña; Since Yesterday (2024), d’Escocia; Yn Arbyl (2026), d’Islla de Man; y Celtic Utopia (2025), d’Irlanda.
This work is licensed under a Creative Commons Attribution 4.0 International License.
