Les hores extra que nun se remuneren nin se compensen equivaldríen a la creación d’unos 1.500 emplegos a xornada completa y suponen un impactu económicu de 73,5 millones d’euros añales en salarios y cotizaciones, según los datos facilitaos por CCOO d’Asturies.

Asturies ye’l territoriu del Estáu con mayor porcentaxe de persones asalariaes que realicen hores extra non pagaes. Cada selmana, alredor de 10.000 trabayadores prolonguen la so xornada ensin recibir compensación económica nin tiempu de descansu, según los datos del sindicatu.

En total, n’Asturies realícense 149.799 hores extra selmanales, l’equivalente a 4.000 puestos de trabayu. D’elles, un 38% nun se paguen, nun se cotizen nin se compensen con descansu, lo que supón unes 56.226 hores de trabayu cada selmana que, según la denuncia sindical, nun queden espeyaes nel salariu nin nel sistema de cotizaciones, ello ye, a cencielles, róbense.

Namás les hores extra non remuneraes equivaldríen a crear unos 1.500 puestos de trabayu a xornada completa. Si se tien en cuenta’l volume total d’hores extra realizaes, la equivalencia algamaría los 4.000 emplegos completos.

El 6% de la población asalariada asturiana realiza hores extra, un porcentaxe superior a la media estatal, que se sitúa nel 5%.

Según CCOO d’Asturies, les hores extra que les empreses nun paguen nin cotizen suponen cada añu una perda de 73,5 millones d’euros en salarios brutos y cotizaciones sociales.

Les persones que realicen hores extra non remuneraes trabayen una media de 5,7 hores adicionales a la selmana, lo que supondría unos 142 euros semanales en salariu y cotizaciones que nun reciben. Nel conxuntu del añu, la cifra rondaría los 7.400 euros por persona.

Dende’l sindicatu señalen que l’impactu nun afecta namái a les persones trabayadores, sinón tamién al conxuntu de la sociedá, pola perda d’ingresos pa la Seguridá Social y pa les alministraciones públiques.

El responsable d’Acción Sindical de CCOO d’Asturies, Damián Manzano, compara’l volume d’estes hores non pagaes cola llegada d’una gran empresa capaz de xenerar miles de puestos de trabayu. Según los sos datos, equivaldría a dar emplegu a tol conceyu de Belmonte de Miranda.

La denuncia sobre les hores extra llega nun momentu nel que la regulación del tiempu de trabayu y la reducción de xornada tán nel centru del alderique públicu. Les organizaciones sindicales vienen reclamando mayor control sobre’l cumplimientu de les xornaes y los drechos llaborales.

Esta situación enmárcase nuna problemática más amplia sobre la calidá del emplegu n’Asturies, marcada pola temporalidá, la precariedá y les dificultaes pa consolidar proyectos de vida estables. La precariedá llaboral afecta a una de cada cuatro persones con trabayu n’Asturies

Les hores extra ensin remunerar tienen especial incidencia en sectores onde les xornaes llargues son más habituales, como la hostelería, el comerciu o determinaes actividaes de servicios, onde la falta de personal y la presión productiva pueden favorecer ampliaciones de xornada. La hostelería asturiana reclama meyores condiciones llaborales y mayor reconocimientu profesional