La iniciativa privada vuelve garrar les riendes na defensa del padremuñu sidreru asturianu. Tierra Astur va destinar parte de la venta de sidre del mes de setiembre a plantar pumares autóctonos, demostrando que la sidre pue xenerar riqueza económica y cultural, pero tamién natural.

Tierra Astur recupera esti añu la so campaña solidaria “Día d’Asturies”, una iniciativa cola que parte de los beneficios obteníos pola venta de sidre va destinase a crear nueves plantaciones de pumares con variedaes acoyíes a la DOP Sidra d’Asturies.

La campaña va desendolcase del 1 al 30 de setiembre nes sidreríes Tierra Astur, nes tiendes Crivencar y al traviés de productosdeasturias.com. Nesta segunda edición, el proyectu amplíase a toles sidres naturales que se sirven nos establecimientos de la empresa, incluyíes les tradicionales, les de Denominación d’Orixe y les integraes en Sidra Selección.

L’oxetivu ye superar les 65.000 botelles y convertir esi consumu en cerca de 1.500 nuevos pumares, repartíos nuna superficie próxima a les trés hectárees. Nun se trata namás de vender sidre, sinón de facer que parte de la riqueza que xenera torne al campu del que salió.

La propuesta tien especial valor nun momentu nel que l’abandonu rural, la perda de pumaraes y los incendios amenacen una parte fundamental del paisaxe asturianu. Recuperar estos terrenos significa producir mazana, crear actividá económica, favorecer l’arraigu y caltener una barrera natural frente a la espansión del fueu.

La primer edición permitió reforestar más de dos hectárees en Somao, nun proyectu desarrolláu con Campoastur y cola participación del alumnáu del colexu Lorenzo Novo Mier, d’Uviéu. Agora, la empresa da un pasu más y estiende’l compromisu a una parte mayor del so consumu de sidre.

Una vegada más, ye la iniciativa privada la que se mueve pa defender un padremuñu que nun se caltién solo con declaraciones institucionales. La cultura sidrera precisa llagares, escanciadores y consumidores, pero tamién cosecheros, pumares vivos y tierra trabayada.

This work is licensed under a Creative Commons Attribution 4.0 International License.