Selce intérpretes mozos d’ocho naciones celtes comparten demientres el Festival Intercélticu d’An Oriant, una residencia empobinada a crear repertorios comunes. Asturies participa esti añu con Julio Rodríguez, al buzuki, y Celia Nieto, al vigulín, dos músicos qu’afiten la presencia de talentu mozu asturianu nel alcuentru bretón.

Enantes de xubir a los escenarios del Festival Intercélticu de Lorient, los participantes del Interceltic Music Camp pasen hores asgaya xuntos na sala d’ensayu. Ellí lleguen con instrumentos, repertorios y formes de tocar de ocho territorios destremaos, pero tamién col envís de construyir en pocos díes una música que nun perteneza dafechu a nengún d’ellos y que al empar caltenga daqué de toos.

La iniciativa ñació nel 2024, cuandu’l festival dedicó una atención especial a la mocedá de les naciones celtes. Aquella primera esperiencia axuntó a selce intérpretes procedentes d’Asturies, Bretaña, Cornualles, Escocia, Galicia, la Islla de Man, Irlanda y Gales. Dende entós, el proyectu perafitose como una de les propuestes formatives más interesantes de Lorient: dos mozos escoyíos por ca dellegación repártense en dos formaciones y preparen delles actuaciones mentantu’l festival.

Nun se trata d’una suma de músicos qu’interpreten a lo xo una pieza de ca país, sinón de buscar conexones ente melodíes, ritmos y formes de tocar que, dacuandu, paecíen alloñaes. Una tonada asturiana pue atopar puntos de contautu con un aire irlandés; un vigulín a la escocesa pue encaxar con una bas gallega, y una dancia bretona adquirir una dimensión nueva cuando apaez al compangu d’instrumentos llegaos d’otres orielles del Atlánticu.

L’acordionista Thomas Moisson y el multiinstrumentista y cantante Youn Kamm encárguense d’orientar el trabayu musical. La so función nun ye imponer un repertoriu peslláu sinón aidar al espoxigue d’idegues nel que los participantes atopen una forma común. Xuntu a ellos, l’equipu de coordinación atiende la loxística diaria y caltién l’ánimu d’un grupu sometíu a un calendariu intensu d’ensayos y actuaciones.

Les xornaes desendólquense nun ambiente festivu, sicasí esi trabayu esixe concentración. Dende pela mañana hasta la tarde, los mozos preben arreglos, intercambien melodíes, modifiquen cadarmes musicales y deprenden a dexar espaciu a instrumentos con volúmenes y funciones bien distintes. Arpes, vigulinos, curdiones, gaites, xiblates y buzuki conviven dientru d’una sonoridá creada específicamente pa Lorient.

El resultáu preséntase en dellos conciertos repartíos pela programación. El festival reserva a estes formaciones espacios onde puen amosar les pieces  convirtiendo’l procesu d’aprendizaxe nuna braera propuesta artística.

La música asturiana suel quedar bultablemente bien representada nesta esperiencia. Les dellegaciones suelen escoyer intérpretes mozos que, a pesar de la so edá, apprten a Lorient con una formación sólida, conocencia del repertoriu tradicional y capacidá en proyeutos coleutivos. Nun vienen únicamente a defender una melodía propia, sinón tamién a escuchar, adaptase y responder musicalmente a compañeros procedentes d’otres cultures.

Na edición de 2026, Asturies participa con Julio Rodríguez, na especialidá de buzuki, y Celia Nieto, al violín. Los dos formen parte d’una dellegación asturiana de 150 presones qu’avera músicos consolidaos con una presencia importante de les nueves xeneraciones. La so incorporación al Interceltic Music Camp permíte-yos trabayar nun contestu destremau al d’un conciertu convencional: equí, la habilidá de caún tien que ponese al serviciu del conxuntu y d’una creación ellaborada ente toos.

Esta participación confirma una carauterística visible nes sucesives dellegaciones asturianes: la combinación de mocedá y destreza. Munchos de los intérpretes que viaxen a Lorient lleguen dempués d’años d’aprendizaxe n’escueles de música tradicional, conservatorios, bandes de gaites o formaciones de folk. El festival ufierta-yos la posibilidá de midir esa conocencia de calter internacional y de comprobar qu’una tradición tamién se refuerza cuando entra en contautu con otres.

Amás, la convivencia constitúi una parte tan importante como los conciertos. Durante la residencia mestúrense llingües, vezos y maneres distintes d’entender la música. Los participantes nun deprenden namás una melodía córnica, galesa o asturiana; conocen a la persona que la lleva consigo, el contestu nel que s’interpreta y el significáu que tien dientro de la so comunidá.

Esa cercanía permite descubrir asemeyances que nun siempre resulten evidentes sobre’l papel. Determinaos ritmos de danza, escales, xiros melódicos o estructures de repetición apaecen en dellos territorios con nomes y funciones distintes. El Music Camp convierte eses coincidencies en materia creativa, ensin desdibuxar les particularidaes de cada tradición.

Nun festival qu’axunta a más de 5.000 músicos, cantantes, bailarinos y creadores, l’Interceltic Music Camp ocupa un espaciu relativamente pequeñu, pero representa con claridá la idea que sostién tol alcuentru. Lorient nun ye únicamente una exhibición simultánea d’ocho cultures: ye un llugar onde eses cultures pueden trabayar xuntes, reconocese y tresformase per mediu del intercambiu.

La mocedá celta atopa asina un escenariu y, enantes que eso, un espaciu pa esperimentar. El valor del proyectu nun reside namás en formar dos grupos durante unos díes, sinón en demostrar que’l patrimoniu musical sigue vivu nes manes d’intérpretes capaces d’estudialu, respetalu y llevalu hacia terrenos nuevos. Asturies participa nesi procesu con músicos mozos que la so preparación y habilidá vuelven asitiar la so tradición al nivel más altu.

This work is licensed under a Creative Commons Attribution 4.0 International License.