El festival lliterariu va cellebrase del 4 al 6 de setiembre nel Recintu Ferial Luis Adaro de Xixón, dientro de la programación de CometCon 26, con alcuentros, alderiques y actividaes dirixíes especialmente al públicu mozu
CometBook va volver esti mes de setiembre a Xixón con una segunda edición centrada na creación lliteraria femenina y nel talentu asturianu. La cita va tener llugar del 4 al 6 de setiembre de 2026 nel Recintu Ferial Luis Adaro y va reunir a escritores, ilustradores y creadores venceyaos al mundu del llibru, el cómic y les redes sociales.
La programación busca averar la lectura al públicu mozu y poner la lliteratura en diálogu con otros llinguaxes contemporáneos, como la ilustración, los videoxuegos, les plataformes dixitales y la cultura audiovisual. Ente les convidades confirmaes tán Sofía Sanz, Alba Seoane y Arantza Margolles.
La ilustradora, fotógrafa y directora artística Sofía Sanz ye autora de les noveles El ser amado y Aquelarre Omega, ilustraes por ella mesma. A lo llargo de la so trayeutoria trabayó con editoriales nacionales y internacionales, estudios de videoxuegos como Riot Games y proyectos rellacionaos col diseñu de xuegos de mesa.
Pela so parte, Alba Seoane, conocida nes redes como @itsalbaseoane, ye autora de la novela xuvenil de fantasía romántica Pinceladas de una traición. La creadora comparte conteníos sobre cine, llibros y escritura con una comunidá de más de 34.000 siguidores, representando una xeneración d’autores que combina la publicación tradicional cola creación de comunidaes llectores nes redes.
CometBook va prestar tamién una atención especial a la lliteratura fecha n’Asturies. Va participar la historiadora, escritora y comunicadora Arantza Margolles, presidenta d’Iniciativa pol Asturianu y ganadora en 2026 del XVIII Premiu Alfonso Iglesias de cómic n’asturianu pola obra Slečno.
Xunto a ella van tar Tania Huelga, autora de noveles como Estrelles de Sangre, y Blanca Fernández Quintana, escritora principalmente en llingua asturiana, collaboradora del festival Celsius 232 y ganadora del XV Premiu Josefa Canellada de lliteratura infantil. Fernández Quintana vien d’espublizar la novela de terror L’otanu.
El programa va incluyir alcuentros coles autores y coloquios sobre la situación de la creación lliteraria n’Asturies, les dinámiques del sector editorial y la formación de comunidaes arredol de los llibros y el cómic.
Los detalles del programa y los próximos nomes convidaos van dir anunciándose nes redes sociales de CometCon. Les entraes yá tán a la venta al traviés de la páxina oficial del eventu, cometcon.org.
This work is licensed under a Creative Commons Attribution 4.0 International License.
