La oposición pa tres places de filólogu/a del Principáu adscrites al Serviciu de Planificación y Normalización Llingüística fízose n’asturianu. El tribunal aplicó’l xacíu y llevó a la práctica, ventiocho años dempués, una previsión contenida na Llei d’Usu de 1998.
El Principáu utilizó l’asturianu como llingua principal nel primer exerciciu d’una oposición pa cubrir una plaza de filólogu. La decisión provocó sorpresa y dalgunes crítiques de sectores antiasturianos porque les bases “nun indicaben espresamente que’l cuestionariu fuera redactase n’asturianu”.
Sicasí, una revisión de la documentación oficial permite esclariar un datu fundamental: la plaza ta destinada al departamentu encargáu de la normalización llingüística del Gobiernu asturianu.
La convocatoria, espublizada nel BOPA’l 19 d’agostu de 2025, referíase de manera xenérica a una plaza de Tituláu Superior —Filólogu—, grupu A, en réxime de personal llaboral fixo. Nun indicaba’l serviciu nin el códigu concretu del puestu, polo que nun entamu nun paecía claro la finalidá d’esos puestos, pero’l Catálogu Consolidáu de Puestos de Trabayu del Principáu resuelve prácticamente la incógnita. Nel documentu solo apaez una entrada cola categoría de Filólogu y reúne tres dotaciones, toes elles dientro del Serviciu de Planificación y Normalización Llingüística, dependiente de la Dirección Xeneral d’Acción Cultural y Normalización Llingüística de la Conseyería de Cultura, Política Llingüística y Deporte. Nun hai nel catálogu otra plaza llaboral cola mesma denominación. Poro, la oposición ta cubriendo eses tres places.
Un filólogu/a de Normalización Llingüística tien de saber asturianu, cae de caxón. De fechu, teniendo en cuenta’l drechu de los asturianos de comunicase na so llingua cola so administración, cualisquier funcionariu debería tener esos conocimientos pa garantizar qu’esi drechu se faiga efeutivu.
La prueba celebróse’l 21 de xunetu nel Institutu Asturianu d’Alministración Pública. El cuestionariu costaba de 80 entrugues puntuables y diez de reserva. Según la información espublizada, la carátula contenía les instrucciones en castellanu y les 17 páxines d’entrugues taben redactaes n’asturianu.
El temariu tamién daba una pista. De los 68 temes del programa, los 57 de la parte específica céntrense na llexislación llingüística, la normalización social, la política llingüística, la enseñanza, la toponimia, les instituciones del asturianu, la sociollingüística, la gramática, la ortografía, la lliteratura, la traducción, la redacción de documentos alministrativos y les ferramientes de sofitu llingüísticu.
La Llei d’Usu de 1998 ordena direutaemente al Principáu que favoreza’l conocimientu del asturianu ente los emplegaos públicos y permite que se valore nes oposiciones y concursos.
Esta previsión lleva ventiocho años en vigor, pero aplícase agora pela primer vegada. Poro, ye de xusticia felicitar al tribunal, presidíu por Juncal Mónica García Velasco y integráu, ente otros, polos filólogos y profesores Ramón d’Andrés Díaz, Marta López Fernández y Liliana Díaz Gómez, con José Ángel Díaz Fernández como secretariu.
La decisión tendría de marcar un precedente, non solo pa esámenes relacionaos direutamente cola llingua como ye’l casu, sinón pa cualisquier puestu de funcionariau de l’alministración asturiana.
This work is licensed under a Creative Commons Attribution 4.0 International License.
