La final del Mundial algamó audiencies históriques nel conxuntu del Estáu, pero’l siguimientu n’Asturies quedó más de diez puntos perbaxo de la media y a quince puntos de la Comunidá de Madrid

Asturies foi el territoriu del estáu onde menor cuota de pantalla tuvo la final del Campeonatu Mundial de fútbol disputada’l 19 de xunetu ente España y Arxentina. Según el gráficu ellaboráu con datos de Fifty5Blue, la media del partíu y de la prórroga concentró n’Asturies un 76,9% de les persones que taben viendo la televisión.

Ello significa que’l 24% restante de l’audiencia televisiva asturiana taba viendo otros conteníos, cuasi una de cada cuatro persones que tenía la televisión prendía nun siguió la final.

El dato ye llamativu porque’l partíu foi un acontecimientu televisivu escepcional nel conxuntu del Estáu. La final reunió una media de 15,7 millones d’espectadores y algamó un 87,1% de cuota de pantalla. La prórroga elevó’l siguimientu hasta los 16,6 millones y el 89,3%, convirtiéndose nuna de les emisiones más vistes de la historia de la televisión nel Estáu español.

El mapa permite apreciar con claridá la singularidá del comportamientu asturianu. La Comunidá de Madrid encabeza’l ránking con un 91,9%, siguida de Cantabria, con un 91,1%. Andalucía llegó al 89,4% y les Isles Baleares al 89,1%.

Nel estremu contrariu apaez Asturies, con un 76,9%. La diferencia con Madrid ye de quince puntos porcentuales, mentes que la distancia cola media estatal supera los diez puntos. Inclusive Galicia, la segunda comunidá col siguimientu más baxu, llegó al 81,2%, más de cuatro puntos perriba d’Asturies. El País Vascu quedó nel 82,6%.

El mapa cuestiona la idea d’una identificación territorial completamente uniforme cola seleición española. Mentes que’l discursu institucional, publicitariu y mediáticu presentó la final como un acontecimientu compartíu prácticamente por tol Estáu, n’Asturies la concentración de l’audiencia foi claramente menor.

Nun se puede deducir automáticamente que les persones que nun vieron el partíu rechazaren a la seleición española, nin que’l datu respuenda únicamente a razones identitaries o polítiques. Pero tampoco debería ignorase una diferencia estadística evidente. N’Asturies hubo más espaciu pa otros gustos, otros intereses y otres formes de pasar la nueche que na inmensa mayoría del Estáu.

La final foi seguida por una mayoría ablucante de l’audiencia asturiana, pero la “unanimidá” resultó bastante menos completa que n’otros llaos. Ya esi 23,1% que resiestió la presión mediática y prefirió mirar pa otra cosa ye, cuando menos, un datu que convida a pensar sobre la pluralidá real d’una sociedá que nun siempre coincide col retratu uniforme que se proyecta dende los grandes medios.

This work is licensed under a Creative Commons Attribution 4.0 International License.