Anúnciense más normes pa la toponimia ensin garantizar el cumplimientu de les que yá esisten, cuando se sabe que la oficialidá ye la única opción real pa garantizar -ente otros drechos- el respetu a los nomes tradicionales

Un de los munchos cartelos que nun respeten la toponimia oficial

La Conseyería de Cultura, Política Llingüística y Deporte anunció una nueva batería d’actuaciones pa reforzar la protección de la toponimia tradicional d’Asturies, presentándola como un pasu más na defensa del patrimoniu llingüísticu del país. Sicasí, l’anuncia vuelve abrir l’alderique sobre la eficacia d’estes iniciatives.

La normativa asturiana yá prevé la oficialización de la toponimia tradicional y afita que los topónimos oficiales son los que tienen de ser emplegaos poles alministraciones públiques. Pesi a ello, sigue siendo frecuente atopar documentación alministrativa, páxines web institucionales, comunicaciones oficiales y elementos de señalización onde continúen utilizándose formes castellanizaes o non oficiales.

Esta situación afecta tamién a munchos conceyos, onde la aplicación de la toponimia oficial ye desigual. En dellos casos conviven les formes oficiales con denominaciones que yá nun tienen validez alministrativa, lo que provoca inseguridá y resta credibilidá al procesu de recuperación toponímica.

Dende sectores venceyaos a la defensa del asturianu considérase que’l principal problema nun ye la falta de nueves normes nin d’anuncios institucionales, sinón el cumplimientu efectivu de la llexislación vixente. Nesi sen, reclámase que les alministraciones empiecen por aplicar de manera sistemática la toponimia oficial en tola documentación, les comunicaciones, los sitios web institucionales y la rotulación pública.

Pa estos colectivos, la protección de la toponimia nun puede llindase a declaraciones d’intenciones o a nuevos planes. Ensin un compromisu real col cumplimientu de la normativa y ensin mecanismos d’inspeición y correición de los incumplimientos, les midíes anunciaes corren el riesgu de quedar en simples declaraciones de voluntá con un alcance bien llindáu.

This work is licensed under a Creative Commons Attribution 4.0 International License.