Les trabayadores del serviciu de repartu de Correos en Ḷḷena entamaron esta selmana una nueva tanda de movilizaciones pa denunciar la falta de personal ya’l progresivu deterioru del serviciu postal nel conceyu. Les protestes consisten en paros parciales de venti minutos al entamu de la xornada llaboral y concentraciones convocaes los martes y los xueves.

Tres una primer selmana de protestes, les emplegaes decidieron caltener les movilizaciones al considerar que la situación sigue ensin resolvese. Nesta ocasión, la concentración del martes treslladóse a la oficina de Correos de La Pola, mientres que la del xueves ta prevista de nuevu frente a la Casa Conceyu, calteniendo’l mesmu formatu de paru parcial.

Les reivindicaciones cuenten col sofitu de la CGT, que denuncia una amenorgadura progresiva del personal disponible y reclama la cobertura de les vacantes pa garantizar un serviciu postal afayadizu tanto nel cascu urbanu como nes zones rurales del conceyu. El sindicatu alvierte de que la sobrecarga de trabayu repercute directamente na calidá del serviciu que recibe la vecindá y nos tiempos de repartu.

Les trabayadores recuerden, amás, que les primeres movilizaciones recibieron el sofitu de los grupos políticos con representación municipal, que manifestaron públicamente la so preocupación pola situación del serviciu. Les protestes van siguir mientres nun lleguen midíes que permitan reforzar la plantiya y garantizar un funcionamientu normal de Correos nel conceyu.

This work is licensed under a Creative Commons Attribution 4.0 International License.