Ana Bayón plantega nel so facebook una cuestión recurrente: la teórica falta de personal pa trabayar na hostelería. Cada branu vuelve la mesma canción, la hostelería nun alcuentra personal, la xente nun acude a les entrevistes, naide quier trabayar, falten profesionales…

Pero quiciabes yá va siendo hora de camudar la entruga.

El problema de la hostelería n’Asturies —y, de xuru, en bona parte l’Estau— nun ye que la xente nun quiera trabayar. El problema ye que, demientres demasiados años, normalizáronse trampes, abusos y condiciones llaborales que quemaron a miles de trabayadores.

Contratos por menos de media xornada que depués conviértense en xornaes reales de 12 o 14 hores.

Hores estraordinaries que nun se declaren, nun se rexistren y nun se paguen como correspuende.

Sueldos que, en munchos casos, malapenes algamen pa vivir, cuando non se pretendió inclusive completar el salariu col bote de les propines, como si la obligación de pagar un sueldu dignu fuera de la vecería y non de la empresa.

Convenios bloquiaos demientres años, con negociaciones eternizaes mientres el costu de la vida xubía ensin frenu.

Falta d’un control eficaz sobre la xornada real de les plantiyes.

Turnos partíos, fines de selmana, festivos, presión constante, tratu col públicu, ritmos intensos y una disponibilidá que munches vegaes s’esixe como si la vida personal de quien trabaya nun esistiera.

Y a too ello hai qu’amestar una realidá evidente: la vivienda, l’alimentación, los suministros y los servicios básicos xubieron muncho más que los salarios del sector. Trabayar tien que valir pa vivir, non namái pa sobrevivir.

La hostelería nun tien namái un problema p’alcontrar personal. Tien un problema de condiciones llaborales, de reputación y de confianza.

Porque cuando un sector furruló mientres años sobre la base de contratos parciales ficticios, hores ensin declarar, salarios baxos y xornaes interminables, nun pue sorprendese depués de que munches persones busquen otres alternatives.

Si n’otros sectores se cobra paecío, pero nun se trabaya tolos fines de selmana, nun hai xornaes partíes, pue conciliase meyor y pue tenese una vida un poco más ordenada, ye normal que muncha xente s’incline por eses opciones.

Nun ye vagancia.

Nun ye falta de cultura del esfuerciu.

Nun ye que «la xente yá nun quiera trabayar».

Ye que la xente yá nun quier regalar la so vida por un salariu que nun-y permite vivir.

Tamién hai que dicilo claro: el conveniu nun ye una medaya empresarial. El conveniu ye’l suelu mínimu que tien de cumplise. Cumplir la llegalidá nun convierte automáticamente un emplegu nun puestu atractivu; simplemente significa que nun se ta incumpliendo lo más básico.

Y el trabayador nunca ye’l problema.

Si una empresa precisa personal pa fines de selmana, festivos, nueches, temporaes fuertes, presión de barra, cocina, comedor y atención al públicu, va tener d’ufiertar condiciones proporcionales a esi sacrificiu: salarios dignos, horarios reales, descansu garantizáu, xornaes rexistraes, hores pagaes, estabilidá y respetu.

La hostelería asturiana precisa profesionales, sí. Pero los profesionales tamién precisen emplegos dignos.

Porque nun falta xente pa trabayar.

Falten condiciones que paguen la pena.

Y mientres nun se quiera falar d’eso, cada branu volveremos a escuchar el mesmu «hit»: que naide quier trabayar.

La realidá ye otra: la clas trabayadora ta cansada de que se-y pida vocación, paciencia y disponibilidá absoluta, mientres se-y niega lo más básico.

Ensin derechos llaborales nun hai futuru pa nengún sector.

Y ensin salarios dignos, tampoco hai turismu de calidá.

This work is licensed under a Creative Commons Attribution 4.0 International License.