La organización alerta d’afecciones a la vexetación de ribera, árboles tiraos y riesgu de reducción del caudal nun enclave de gran valor ambiental en Gobiendes

Entornu natural de la Fonte d’Obaya, onde la Coordinadora Ecoloxista denuncia daños pola nueva captación d’agua.

La Coordinadora Ecoloxista d’Asturies denunció l’impactu de les obres d’una nueva captación d’agua nel entornu de la Fonte Santa d’Obaya, en Gobiendes, nel conceyu de Colunga. Según esplica’l colectivu, nos caberos díes comprobóse la instalación d’una nueva tubería d’unos 200 metros, na mesma zona onde yá esiste la captación actual de la Fonte d’Obaya.

La organización ambiental asegura que les obres afectaron al dominiu públicu y provocaron daños na vexetación de ribera. Tamién señala la presencia d’árboles tiraos, alteraciones nel suelu y posibles efeutos sobre l’agua circulante. Por ello, reclama que tanto’l Gobiernu d’Asturies como’l Ministeriu competente actúen ante los daños causaos nun espaciu de gran sensibilidá ecolóxica.

Obaya ye un valle encaxonáu na lladera norte del Paisaxe Protexíu de la Sierra del Sueve. Dende’l puntu de vista botánicu, trátase d’un bosque mixtu atlánticu que forma corredores a los dos llaos del ríu, con una gran variedá de plantes y helechos. Dalgunos d’ellos tienen un valor escepcional nel contestu européu pola so rareza y pola rellación con ambientes húmedos conservaos.

La singularidá d’esti espaciu tien que ver cola cercanía al mar y cola presencia de surgencies d’agua, que caltienen una humeá elevada y suavicen les condiciones térmiques. Esa combinación permitió la pervivencia d’especies de helechos asociaes a climes antiguos, como’l helechu de los colchoneros (Culcita macrocarpa) o la helechilla (Trichomanes speciosum), recoyíes nel Catálogu Rexonal de Flora Amenazada.

La Coordinadora recuerda que vien denunciando dende hai tiempu l’impactu del aprovechamientu anterior de la Fuente d’Obaya, especialmente visible na época estival, cuando’l caudal mengua de forma acusada. A esa situación súmase, según el colectivu, la baxada continuada de la pluviosidá y l’agravamientu deriváu del cambéu climáticu, que reduce la recarga de los acuíferos y pon más presión sobre los cursos d’agua.

L’asociación advierte amás de que xunetu y agostu coinciden col periodu de mayor consumu d’agua nel conceyu, pola medría de población vinculada al turismu. Nesi contestu, considera que potenciar nueves viviendes y más demanda ensin garantizar el caudal ecolóxicu puede agravar la situación d’un espaciu especialmente fráxil.

Pa la Coordinadora Ecoloxista, ye urxente buscar alternatives d’abastecimientu que nun carguen sobre la Fuente d’Obaya. Al empar, reclama al Ayuntamientu de Colunga que priorice midíes d’aforru d’agua potable, una meyor conservación de la rede y el caltenimientu de les depuradores actuales pa usos compatibles, como la llimpieza, antes de siguir aumentando la presión sobre les fontes esistentes.

This work is licensed under a Creative Commons Attribution 4.0 International License.