La UABRA vuelve del 20 al 24 de xunetu al Campus d’El Milán, n’Uviéu, con tres cursos dedicaos al C1 d’asturianu, la lliteratura obrera y l’usu de la intelixencia artificial nel aula

La Universidá Asturiana de Branu, UABRA, abre’l plazu d’inscripción pa la so edición de 2026, que va celebrase del 20 al 24 de xunetu nel Campus d’El Milán, na Facultá de Filosofía y Lletres de la Universidá d’Uviéu. La propuesta d’esti añu vuelve apostar por una formación intensiva venceyada a la llingua asturiana, la cultura y les nueves ferramientes docentes.

La ufierta formativa ta compuesta por tres cursos de 25 hores, toos ellos n’horariu de mañana. El programa inclúi’l Cursu de preparación pa la certificación C1 de llingua asturiana, El movimientu obreru na lliteratura asturiana contemporánea y Intelixencia Artificial aplicada al aula de Llingua Asturiana.

El cursu de preparación pal C1 ta pensáu pa persones que yá tengan una conocencia intermedia del idioma y quieran reforzar el so nivel nos distintos planos comunicativos de cara a la certificación oficial. La formación va trabayar situaciones comunicatives orales, situaciones comunicatives escrites y estudiu gramatical. El profesoráu va tar formáu por Claudia Elena Menéndez, Inaciu Galán y González, Pablo Rodríguez Medina y Xavier Cayao Valdés.

La segunda propuesta, El movimientu obreru na lliteratura asturiana contemporánea, diríxese al públicu xeneral interesáu na historia recién d’Asturies, nel movimientu obreru y na lliteratura asturiana contemporánea. El cursu va abordar, ente otros conteníos, la presencia del movimientu obreru nel teatru, la narrativa y la poesía, la historia del movimientu obreru, la desindustrialización, la relación ente política y lliteratura y la conformación del estándar. Recomiéndase tener superada la Prueba de conocencia de l’ALLA o contar con conocimientos d’asturianu. El profesoráu inclúi a Claudia Elena Menéndez, Darío de Dios Sanz, Irene Díaz Martínez, Marta López Fernández, Marta Mori d’Arriba, Pablo Rodríguez Medina y Rafael Rodríguez Valdés.

El tercer cursu, Intelixencia Artificial aplicada al aula de Llingua Asturiana, ta empobináu al profesoráu de Llingua Asturiana y Lliteratura de cualesquier etapa educativa. La formación quier amosar qué puede apurrir la IA a la enseñanza del asturianu, cómo usala pa diseñar materiales y actividaes y de qué manera aplicala con criterios pedagóxicos, inclusivos y de seguridá. Los conteníos van tratar l’atención a la diversidá y la evaluación, l’usu éticu y críticu d’estes ferramientes, la so aplicación n’Infantil, Primaria, Secundaria y Bachilleratu, los fundamentos de la intelixencia artificial aplicada a la educación y los usos didácticos na planificación y creación de materiales. El cursu va tar impartíu por Laura Roces García, Olatz da Silva Rosales, Roberto Avello Rodríguez y Santiago Fano Méndez.

Los cursos de branu de l’Academia de la Llingua Asturiana constitúin un espaciu d’enseñu llingüísticu y cultural intensivu. La UABRA desendólcase cola collaboración de la Universidá d’Uviéu y el Principáu d’Asturies, y xebra la so ufierta ente la formación llingüística xeneral y los cursos d’afondamientu cultural y llingüísticu.

La matrícula va tar abierta hasta’l 13 de xunetu de 2026. La información de la Universidá Asturiana de Branu puede consultase al traviés de la web www.alladixital.org.

This work is licensed under a Creative Commons Attribution 4.0 International License.