Un informe d’Ecoloxistes n’Aición asitia al Principáu ente los territorios con peor valoración del Estáu, con namás un 10% de cumplimientu y dientro de la categoría “graves carencies”

Asturies queda ente les comunidaes autónomes con peor valoración na aplicación del Marcu Mundial de Biodiversidá de Kunming-Montreal, según l’informe fechu públicu por Ecoloxistes n’Aición pa evaluar les polítiques autonómiques y la so adecuación al oxetivu de frenar la perda de biodiversidá antes de 2030. Asturies llogra namás un 10% de cumplimientu y entra na categoría “graves carencies”, mui lloñe de los niveles que permitiríen considerar que les polítiques públiques van nel camín afayadizu.

El Marcu Mundial de Biodiversidá de Kunming-Montreal foi aprobáu en diciembre de 2022 na COP15 del Conveniu sobre la Diversidá Biolóxica por 196 países, ente ellos l’Estáu español y la Unión Europea. El documentu establez una fueya de ruta global pa detener y invertir la perda de biodiversidá antes de 2030 al traviés de 23 metes concretes. Ecoloxistes n’Aición yá presentara n’abril una evaluación del cumplimientu a nivel estatal, pero agora analiza’l papel de les comunidaes autónomes, claves porque tienen competencies importantes na xestión de la naturaleza.

La organización evaluó diez ámbitos venceyaos coles metes más rellacionaes coles competencies autonómiques: estratexes de biodiversidá, restauración ecolóxica, xestión d’espacios protexíos, especies exótiques invasores, contaminación agraria, infraestructura verde, integración de la biodiversidá nes polítiques sectoriales, conservación d’especies amenaciaes y participación social. El resultáu xeneral ye preocupante: nenguna comunidá nin ciudá autónoma algama les categoríes “nel bon camín” o “necesita ameyorar”.

Nel casu asturianu, l’informe fala d’un incumplimientu xeneralizáu de les obligaciones que correspuenden a l’Alministración autonómica dientro d’esi marcu internacional. La valoración del 10% asitia Asturies nel bloque de los territorios con peor resultáu, xunto con otres comunidaes y ciudaes autónomes que tamién queden perbaxo del 25%. Pa Ecoloxistes n’Aición, la situación demuestra que, a menos de cuatro años del horizonte de 2030, l’aplicación del marcu en munchos territorios sigue siendo fragmentaria, insuficiente y, nel casu asturianu, casi inexistente.

Un de los puntos centrales del informe ye qu’Asturies nun tien una estratexa de biodiversidá vixente. Según los datos de la organización, namás cinco comunidaes autónomes cuenten con una: Andalucía, Aragón, Cataluña, Euskadi y la Comunitat Valenciana. La falta d’una estratexa actualizada dexa al Principáu ensin una planificación clara, ensin oxetivos cuantificables, ensin mecanismos de siguimientu específicos y ensin un compromisu presupuestariu afayadizu pa facer frente a la perda de biodiversidá.

L’informe tamién señala una contradicción relevante: Asturies ye una de les comunidaes con más porcentaxe de territoriu baxo dalguna figura de protección ambiental, pero esa protección resulta mui deficiente. La mayoría de los espacios protexíos asturianos nun tienen plan de xestión y que, nos casos nos que sí esiste, la so aplicación efectiva ye insuficiente. 

Esa crítica concrétase na denuncia d’obres y actuaciones como apertura de pistes, tales y desbroces en zones de máxima protección. Ecoloxistes n’Aición señala tamién que se proyectaron y, en dellos casos, llegaron a executase actuaciones en espacios protexíos ensin una evaluación ambiental afayadiza, como ye’l casu del mirador de Saliencia o el de La Princesa en Picos. Pa la organización, esti tipu de polítiques fai que la protección ambiental declarada quede debilitada na práctica.

La situación de les especies amenaciaes ye otru de los puntos más graves del diagnósticu. L’informe denuncia que n’Asturies nun esisten planes de recuperación y conservación pa especies amenaciaes pese a la esixencia llegal, citando casos como’l urogallu y el desmán ibéricu. Tamién critica que se permita la pesca d’especies que sufrieron una reducción importante de población, como’l salmón y l’angula.

Ecoloxistes n’Aición cuestiona igualmente los programes d’eliminación de llobos y cormoranes grandes aprobaos ensin, según la organización, respaldu científicu suficiente. El colectivu afirma que yá se abatió un númberu importante d’exemplares y que les midíes nun demostraron nin una reducción de los daños al ganáu nin una recuperación de los salmónidos, argumentos que sirvieron pa xustificar eses actuaciones.

L’informe relaciona amás la perda de protección en parques naturales con posibles afecciones a zones sensibles pal urogallu, incluyíos espacios onde s’atopaben cantaderos y que podríen ser oxetu de tala o desbroce. D’igual manera, vincula la recuperación de los salmónidos cola conservación de los bosques de ribera, y critica la eliminación d’esti tipu de vexetación en distintos puntos d’Asturies.

La falta d’una política sólida sobre especies exótiques invasores ye otru de los problemes señalaos. Según Ecoloxistes n’Aición, les actuaciones autonómiques céntrense nel control o la erradicación puntual, pero nun hai planes orientaos a reducir nun 50% les tases d’introducción y establecimientu d’estes especies antes de 2030. Nel casu asturianu, l’informe considera especialmente insuficiente la respuesta frente al plumero de la Pampa, Cortaderia selloana, que sigue espardiéndose en zones industriales y nos taludes d’infraestructures ferroviaries y carreteres.

El documentu tamién recueye déficits comunes al conxuntu del Estáu, pero con incidencia directa n’Asturies. Cataluña ye la única comunidá con un plan específicu rellacionáu col usu sostenible de productos fitosanitarios, y nenguna tien prevista una reducción de la contaminación agraria del 50% pa 2030. En materia d’infraestructura verde, namás Galicia y Castiella-La Mancha aprobaron estratexes autonómiques en cumplimientu de la Estratexa Estatal.

El horizonte de 2030 ta yá cerca. L’informe conclúi que, si sigue la tendencia actual, les alministraciones autonómiques van impedir que l’Estáu español cumpla los compromisos internacionales asumíos en materia de biodiversidá. Nel casu d’Asturies, la valoración del 10% funciona como una alerta clara: el Principáu suspende na aplicación del Marcu Mundial de Biodiversidá y llega tarde a una crisis que yá afecta al territoriu, a los ecosistemes y a les especies más vulnerables.

This work is licensed under a Creative Commons Attribution 4.0 International License.