El festival cellebra la so sétima edición del 26 al 28 de xunu ente l’Espaciu FMC y la CAB de Güeñu, con actuaciones de Muyeres, María Arnal, Depresión Sonora, La Sonrisa de Julia, Puño Dragón o Billy Boom Band, ente otros nomes
VESU vuelve esti fin de selmana cola so séptima edición, que va cellebrase ente’l vienres 26 y el domingu 28 de xunu con una programación repartida ente Uviéu y La Ribera. El festival refuerza asina la so apuesta pola música en direuto gracies al sofitu de la Fundación Municipal de Cultura del Conceyu d’Uviéu y del Conceyu de La Ribera.
Les actuaciones van desendocase en dos espacios. N’Uviéu, l’actividá va concentrase nel Espaciu FMC, asitiáu n’El Campillín, dientro de la Fundación Educativa Santo Domingo – Dominicos. La xornada de clausura va treslladase a la CAB de Güeñu, la Central Artística de Gúeñu, que vuelve convertise n’escenariu del pieslle del festival.
El vienres 26 de xunu, l’Escenariu Vibra Mahou del Espaciu FMC va abrir la programación con una xornada de conciertos que va entamar a les 19.30 hores con Sobrezero. Dempués van xubir al escenariu Dora Band, a les 20.40 hores, nuna de les sos poques actuaciones d’esti branu; Snake Eyes, a les 22.15 hores; y Mujeres, que va encargase de presllar la nueche a les 23.50 hores. La DJ xixonesa Lucía Dilema va poner la música ente conciertos y tamién al final de la xornada.
El sábadu 27, VESU va siguir nel Espaciu FMC con una doble sesión. La programación del vermú va principiar a les 13.00 hores con Las Petunias y va continuar a les 14.25 hores con DenisDenis. Pela tarde va llegar ún de los momentos destacaos del fin de selmana col Conciertu Vibra Mahou de La Sonrisa de Julia, previstu pa les 19.00 hores. La xornada va completase con Depresión Sonora, a les 20.35 hores; Puño Dragón, a les 22.20 hores; y María Arnal, que va salir al escenariu a les 00.10 hores pa poner el puntu final al sábadu. Mientres tol día, Mediocre va tar al frente de la cabina de DJ.
La despidida del festival va ser el domingu 28 de xunu na CAB de Güeñu, col sofitu del Conceyu de La Ribera. Esta xornada, pensada con un formatu familiar, va cuntar coles actuaciones de Begut, a les 13.00 hores, y Billy Boom Band, a les 14.15 hores. Diskreepo va encargase de la sesión de DJ y de poner el broche final a esta séptima edición.
Los caberos abonos y entraes de día puen mercase en www.vesuoviedo.com. Los precios son de 30 euros más gastos de xestión pa la xornada del vienres, 45 euros más gastos de xestión pa la del sábadu, 5 euros pa la entrada del vermú del domingu y 60 euros más gastos de xestión pal abonu completu del festival.
.
This work is licensed under a Creative Commons Attribution 4.0 International License.
