La operación que’l Principáu  tien enriba la mesa pa facilitar la implantación de la industria de la guerra n’Asturies abre la posibilidá de que’l Gobiernu asturianu declare d’utilidá pública o interés social el proyectu, una fórmula que podría abrir la puerta a la espropiación forzosa de los bienes y derechos necesarios pa sacar alantre la iniciativa 

Dicho d’otra manera: lo que se ta valorando ye si una fábrica vinculada a la producción de vehículos blindaos puede recibir el tratamientu alministrativu d’una actuación d’utilidá pública o social. Esa ye la clave política y xurídica del casu.

El Gobiernu asturianu ta tramitando los planes industriales d’Indra nel Tallerón de Xixón y nel recintu de Barros como Proyectu d’Interés Estratéxicu Rexonal, PIER. Según esplicó’l conseyeru de Ciencia, Industria y Emplegu, Borja Sánchez, Indra presentó hai una selmana la solicitú del PIER, que contempla “la parte productiva” de les inversiones de la empresa n’Asturies: la fábrica de blindaos de Xixón y, si fructifica la negociación con Duro Felguera, la de Barros.

Pero la declaración como PIER nun implica automáticamente la consideración d’utilidá pública o interés social. La llei nun establez esi efeutu de manera xeneral. Trátase d’un mecanismu facultativu, que solo s’activa si lo solicita’l promotor, y que tendría d’integrase nel propiu alcuerdu del Conseyu de Gobiernu que declare’l proyectu como PIER.

L’artículu 7.2 de la llei PIER ye claru nesi puntu. El testu establez que “el alcuerdu del Conseyu de Gobiernu que declare la condición de PIER podrá incluir, a petición del promotor, la declaración d’utilidá pública o interés social, identificando la rellación de bienes y derechos afectaos, pudiendo esti resultar beneficiariu de la mesma; too ello, colos efectos previstos na llexislación en materia d’espropiación forzosa”. La mesma norma recueye que dicha espropiación podría tramitase pol procedimientu de tasación conxunta.

La consecuencia ye relevante: la declaración d’utilidá pública nun sería un simple sellu alministrativu nin una fórmula retórica pa reforzar el proyectu. La so finalidá principal ye facilitar la espropiación forzosa de los bienes y derechos necesarios pa executar la iniciativa.

Nel casu de Barros, esi escenariu adquier una dimensión especialmente delicada. El Principáu estudia recurrir a una figura pensada pa proxectos consideraos d’interés públicu cola fin de garantizar la implantación d’una fábrica d’armes en terrenos que pertenecen a Duro Felguera. Si la negociación ente les empreses nun llega a bon puertu, la declaración d’utilidá pública podría habilitar mecanismos d’intervención de l’Alministración.

El propiu conseyeru afirmó que’l proyectu de Barros, amás de ser PIER, interesa al Gobiernu que cunte cola declaración d’utilidá pública “pa escenarios futuros”. Tamién señaló que la iniciativa ye “políticamente irrenunciable” y apeló a la “xenerosidá” d’Indra y Duro Felguera pa que les dos empreses alcancen un alcuerdu sobre la venta del taller que’l grupu d’inxeniería tien en Barros.

Sánchez aseguró que dambes partes tán “poniendo la meyor de les voluntades” na negociación y amosóse optimista sobre la posibilidá d’un entendimientu. Sicasí, el fechu de que’l Principáu quiera dotar al proyectu d’esa cobertura xurídica revela que’l Gobiernu asturianu busca tener preparada una vía d’actuación alministrativa si l’alcuerdu priváu nun acaba fraguando.

La operación forma parte d’una propuesta más amplia d’Indra pa impulsar un polu “industrial y tecnolóxicu” basáu na industria de guerra n’Asturies. Esa propuesta integra les instalaciones d’El Tallerón, les actividaes venceyaes al tráficu aéreu y un nuevu centru de fabricación nel antiguu taller de Barros.

La declaración d’utilidá pública o interés social concede ventayes alministratives relevantes y puede convertir al promotor nel beneficiariu de los efectos previstos pola llexislación d’espropiación forzosa. Nun se trata, polo tanto, d’un trámite menor, sinón d’una decisión con consecuencias patrimoniales, polítiques y simbóliques.

El Principáu non solo ta impulsando la llegada d’una empresa armamentística a Barros; ta contemplando la posibilidá de da-y al proyectu una categoría xurídica que tradicionalmente s’asocia a actuaciones d’interés xeneral, venceyando grotéscamente belicismu ya interés social, nun malabarismu pelligrosu.

This work is licensed under a Creative Commons Attribution 4.0 International License.