El Parque Isabel La Católica va ser, del 3 al 5 de xunetu de 2026, la sede del Campeonatu Européu d’Esguilar Árboles, una cita internacional que va axuntar en Xixón a los meyores arbolistes profesionales del continente.
L’eventu, entamáu pola International Society of Arboriculture (ISA), en collaboración cola Asociación Española de Arboricultura (AEA) y col sofitu del Conceyu de Xixón, el so serviciu de parques y xardinos y Visita Xixón, llega a la ciudá dempués de pasar por enclaves como Pszczyna, en Polonia, en 2025; Jastrebarsko, en Croacia, en 2024; Budmerice, n’Eslovaquia, en 2023, y Bruseles, en Bélxica, en 2022.
La vicealcaldesa de Xixón y conceyala d’Economía, Emplegu, Turismu y Anovación, Ángela Pumariega, destacó que “la celebración d’esti eventu en Xixón ye una muestra más de la capacidá del nuestru conceyu d’acoyer con ésitu xuntes y eventos de toa traza y tamañu”. Pumariega subrayó amás el papel de la Oficina de Congresos pa facer que Xixón cunte con una programación “completísima” y se vaya consolidando como referente nel turismu MICE.
La vicealcaldesa señaló tamién que la organización del campeonatu escoyó Xixón ente delles ciudaes candidates a ser sede, y amosó’l so convencimientu de que la ciudá va ser “un escenariu magníficu”. Amás, apuntó que la competición va sirvir pa que participantes y espectadores de toa Europa conozan ún de los aspeutos más destacaos y, al empar, menos promocionaos de Xixón: el so patrimoniu natural.
El Campeonatu Européu d’Esguilar Árboles ufre una oportunidá competitiva pa que los arbolistes n’activo amuesen y intercambien nueves téuniques d’esguila, equipos y meyores práutiques. Como cadañu, el campeonatu va cuntar con pruebes de trabayu, ascensu, rescate, esguile rápidu, flonda y prueba de maestros.
El conceyal de Mediu Ambiente y Sostenibilidá de Xixón, Rodrigo Pintueles, aseguró que “acoyer esti campeonatu ye una oportunidá pa siguir fomentando la cultura del respetu, el conocimientu y el cuidáu del nuestru patrimoniu arbóreu, y pa revindicar el papel de los profesionales que trabayen caldía pa caltenelu nes condiciones meyores”.
La cita européa va sirvir tamién pa fortalecer la rellación ente la ISA y les asociaciones del continente, ente elles l’AEA, qu’actúa como anfitriona, amás de coles empreses del sector venceyaes a l’arboricultura.
Van ser unes xornaes intenses y prestoses, nun entornu singular, con actividaes llúdiques y didáutiques, Feria de Materiales y el espectáculu visual que supón ver “volar” a los trepadores na competición.
El programa va entamar el miércoles 1 de xunetu col rexistru de voluntarios. El xueves 2 va facese’l rexistru de competidores y patrocinadores, amás del reconocimientu del tarrén. El vienres 3, dempués de la revisión de material, va celebrase la ceremonia d’apertura y van entamar les pruebes preliminares. El sábadu 4 van siguir les pruebes preliminares y el domingu 5 va tener llugar la Prueba de Maestros.
El Parque Isabel La Católica, ún de los espacios verdes históricos y de mayor valor botánicu y paisaxísticu d’Asturies, va acoyer esti campeonatu nun marcu especialmente venceyáu al patrimoniu natural urbanu de Xixón. Asitiáu nel corazón de la ciudá, diseñáu en 1941 sobre les marismes antigües del ríu Piles y catalogáu como Bien d’Interés Cultural, esti pulmón verde va ser l’escenariu d’una competición que xune téunica profesional, divulgación y respetu polos árboles.
This work is licensed under a Creative Commons Attribution 4.0 International License.
