La Plataforma contra la Quema de Basura y el Conceyu contra la Incineración de Asturies convoca una concentración en Mieres previa al conciertu de Víctor Manuel, que va celebrase güei, vienres 19 de xunetu, a les 19.30 hores, nel pozu Barredo.

Dambos colectivos consideren necesario espresar públicamente’l so refugu a la incineradora nun actu de gran visibilidá social como’l conciertu del cantante mierense, al tratase d’un artista al que consideren «reivindicativu y de la nuestra tierra» y d’una cita multitudinaria nel coral de les cuenques.

El movimientu antiincineración recuerda que llogró una sentencia favorable nel contenciosu-alministrativu presentáu contra l’autorización del proyectu. Sicasí, el Principáu recurrió posteriormente esa resolución, polo que la defensa xurídica continúa agora al traviés d’un recursu de casación énte’l Tribunal Supremu.

Amás, la Plataforma denuncia que’l Gobiernu asturianu concedió en marzu una nueva autorización, que considera de dudosa llegalidá, pal entamu de les obres. Esa decisión foi recurrida en reposición por centenares de persones firmantes, anque’l recursu foi desestimáu pola propia Alministración autonómica.

Los colectivos organizadores insisten en que’l posible impactu de la incineradora nun afectaría namás a les cuenques y al so entorno inmediatu, sinón al conxuntu de l’Asturies central, onde reside la mayor parte de la población y onde, según señalen, yá se rexistren problemes importantes de calidá del aire. Nesti sen, alvierten de que siguir alantre col proyectu supondría agravar una situación ambiental y sanitaria yá esistente.

La Plataforma fai un llamamientu a la participación ciudadana pa defender la salú, el territoriu y un modelu de xestión de residuos que nun pase pola incineración de basoria.

This work is licensed under a Creative Commons Attribution 4.0 International License.