El grupu de música lletrónica Karetus pondrà’l ramu al FIMI
Asturies va convertise esti sábadu na capital ibérica de les mazcaraes tradicionales cola celebración del gran desfile del XVIII Festival Internacional de la Mázcara Ibérica (FIMI), un eventu que, por primer vegada nos sos 17 años d’hestoria, abandona Portugal pa celebrar la so edición n’Asturies.
La cita principal va entamar a les 17:00 hores na Plaza de la Casa Conceyu d’Uviéu. Dende ellí, más de 500 representantes de mazcaraes d’iviernu procedentes de distintos territorios de la Península Ibérica y d’otros países europeos desfilarán pel centru de la ciudá hasta llegar al Bombé, nel Campu San Francisco. El desfile va convertir les cais d’Uviéu nun auténticu espectáculu de tradición, soníu y coloríu, onde nun van faltar les mázcares, pelleyos, cencerros, esquiles, llueques y palos que caractericen estes celebraciones ancestrales.
Consideráu’l mayor alcuentru de mazcaraes tradicionales que se celebra na Península Ibérica, el FIMI reúne cada añu grupos que representen una parte esencial del patrimoniu inmaterial de los pueblos ibéricos. Nesta edición, amás de delegaciones d’España y Portugal, participen grupos de países como Bulgaria, Grecia, Rumanía o Andorra, reforzando la dimensión internacional del festival.
El festival, que vien celebrándose de magar 2006, escoyó Asturies como sede de la so decimoctava edición, convirtiéndose asina na primer ocasión na que l’eventu se desendolca fuera de territoriu portugués. La programación, que vien celebrándose dende’l pasáu 12 de xunu en distintos conceyos asturianos, inclúi esposiciones, conferencies, cine, alcuentros académicos y actividaes culturales venceyaes al mundu de les mazcaraes tradicionales.
Tres el desfile, la fiesta va siguir nel quioscu del Bombé cola actuación de caretos portugueses y el conciertu del grupu electrónicu portugués KARETUS, encargáu de poner el broche final a una xornada histórica pa les tradiciones rituales d’iviernu y pa la proyección internacional del patrimoniu cultural asturianu.
Mientres unes hores, el retumbar de los cencerros y l’espectacularidá de les mazcaraes van facer d’Uviéu un espaciu únicu onde tradición, música y cultura popular van xunise nun desfile irrepetible.
This work is licensed under a Creative Commons Attribution 4.0 International License.
