La coleición «Terrén» algama’l so segundu númberu col trabayu  d’Antonio Alonso de la Torre García ‘La cultura tradicional nos territorios d’El Ríu de Trubia”. El nuevu volume, yá disponible nes llibreríes asturianes, va presentase esti vienres 22 de mayu, a les 19 hores, na Casa la Cultura de Proaza.

La publicación recueye y reedita una parte fundamental de la obra qu’Antonio Alonso de la Torre García foi ufiertando a la Academia de la Llingua Asturiana alredor de la cultura tradicional nos valles d’El Ríu de Trubia. Los trabayos compendiaos espublizárense ente 1997 y 2020 na revista Cultures: Revista Asturiana de Cultura, concretamente ente los númberos 7 y 24.

L’obra céntrase nel dominiu territorial de los conceyos de Proaza, Quirós y Teberga, y amuesa una de les principales carauterístiques del trabayu del autor: la capacidá pa combinar la escala local de pueblos y parroquies cola visión más amplia de conceyu. Esa manera de trabayar permitió-y desendolcar un intensu llabor de campu y apurrir una mirada fonda y detallada sobre la realidá cultural d’estos territorios.

Antonio Alonso de la Torre García ye mayestru, espertu en llingua asturiana, llicenciáu n’Historia y doctor n’Historia del Arte. La so trayeutoria profesional desendolcóse primero como maestru d’escuela y depués como profesor d’institutu, anque la docencia nunca-y torgó la dedicación constante al estudiu cultural de la contorna que meyor conoz: la qu’altraviesa El Ríu de Trubia dende los cumales fasta la so amestadura con El Ríu Nalón.

Amás de los trabayos agora recoyíos na coleición «Terrén», destaca tamién la so aportación a la coleición académica Testos de Recoyida Oral col volume Dichos, cuentos y otres narraciones recoyíes en Villamexín, asina como’l so importante llabor de recoyida toponímica na zona. Frutu d’esi esfuerciu son dellos volúmenes dedicaos al conceyu de Proaza espublizaos dientro de la coleición Toponimia de la Academia de la Llingua Asturiana.

La presentación del llibru quier convertise nun alcuentru cola memoria, la tradición y la cultura popular d’una de les zones con más riqueza patrimonial d’Asturies. La organización anima a vecinos, investigadores y persones interesaes na cultura asturiana a participar nel actu

This work is licensed under a Creative Commons Attribution 4.0 International License.