Papeleta de sofitua a la llucha escontra la quema basoria en La Pereda

La Plataforma escontra la Quema de Basoria/CRS convoca una movilización esti miércoles frente la Xunta Xeneral y impulsa iniciatives pa financiar la so batalla llegal

La Plataforma escontra la Quema de Basoria/CRS convoca esti miércoles 13 de mayu, a les 11:30 hores, una concentración frente a la Xunta Xeneral, n’Uviéu, pa mostrar el refugu a la quema residuos n’Asturies y a les polítiques que la favorecen.

La movilización enmárcase nuna campaña que vien desendolcando esti coleutivu dende hai tiempu, col oxetivu de defender un modelu de xestión de residuos más respetuosu col mediu y cola salú de la población. Dende la Plataforma animen a la ciudadanía a sumase a esta convocatoria, qu’aspira a dar visibilidá a una esixencia social ca vegada más presente.

Amás, el coleutivu entamó una iniciativa solidaria pa recaldar fondos colos que facer frente a los gastos xurídicos. Trátase del sortéu d’una cesta con abondos productos, pa la que yá tán a la venta les papeletes. El sortéu va celebrase’l próximu 23 de mayu, dientro d’una fiesta recaldativa nos llocales Mercurio, en La Peña, en Mieres, onde va haber música en direutu, sesión de DJ y pinchéu.

Nel ámbitu llegal, recuerden que esti xueves 14 fina’l plazu pa presentar recursos escontra la nueva autorización espresa que concedió’l ‘Principado’ a Hunosa. Dende la Plataforma señalen qu’hai problemes nel rexistru d’estos recursos, polo qu’encamienten a presentalos lo enantes posible.

Asina mesmo, sigue abiertu’l llamamientu a la collaboración económica pa poder encarar los próximos procesos xudiciales, ente ellos un segundu contenciosu y posibles recursos de casación. Les donaciones puen realizase al traviés de la campaña habilitada en:

Fondo escontra la incineración de residuos n’Asturies

Per otra parte, la Plataforma informó de que yá ye firme la sentencia escontra’l vertederu de cenices de Lada, nel conceyu Llangréu, una resolución que supón un pasu importante na defensa del territoriu frente a esta triba d’instalaciones.

This work is licensed under a Creative Commons Attribution 4.0 International License.