Les protestes centren les sos crítiques nun modelu organizativu que, según denuncien representantes de la plantiya, ta provocando una pérdida continuada d’emplegu, una creciente sobrecarga llaboral y un aumentu de los riesgos pa la salú y la seguridá de los trabayadores, al empar que se multipliquen les retribuciones del equipu directivu.

Les movilizaciones van consistir en paros de dos hores diaries convocaos pa los meses de xunu, setiembre y ochobre, con posibilidá de continuidá si la empresa nun abre un procesu de negociación real cola representación de la plantiya.

El conflictu tien el so orixe nel espediente de regulación d’emplegu aprobáu en 2021. Naquel momentu, la empresa defendió que los cambeos tecnolóxicos y el pieslle de determinaes naves facíen necesaria una reducción de personal. Sicasí, dende sectores de la plantiya vien denunciándose dende entós que la fábrica quedó ensin marxe organizativu y con una dotación insuficiente pa cubrir la carga real de trabayu.

Según denuncien los trabayadores, la supuesta “polivalencia” acabó convirtiéndose nuna multitarea estructural na que una mesma persona tien qu’asumir funciones y responsabilidaes de distintos puestos. Eso provoca, aseguren, una presión constante sobre la plantiya y dificulta la organización de descansos, permisos o procesos formativos.

Les consecuencies d’esa situación, señalen, yá son visibles: aumentu de baxes médiques, repunte de la siniestralidá llaboral y un deterioru progresivu de les condiciones de trabayu. Dende la representación social afirmen que nun se trata d’una circunstancia puntual, sinón del resultáu previsible de los recortes de personal aplicaos sobre una plantiya que yá taba sobrepasada.

Les crítiques diríxense  escontra la dirección de la empresa, a la que se reprocha mantener el mesmu modelu organizativu pese a les señales d’alerta internes y a les denuncies presentaes nel comité d’empresa. Según sostienen los convocantes de la fuelga, mientres la presión sobre la plantiya medra, les retribuciones variables y bonus del equipu directivu siguen aumentando.

Otra de les cuestiones que más malestar provoca ye que, al mesmu tiempu que se denuncien recortes y falta de personal, la empresa reclame apoyu institucional, inversiones públiques y meyores d’infraestructures industriales n’Asturies.

Les reivindicaciones de la plantiya inclúin un refuerciu del personal, llendes reales a la multitarea, descansos efectivos, l’aplicación del contratu relevu y una revisión del sistema retributivu internu, que consideren desproporcionáu ente la dirección y los trabayadores.