Dos años de solicitudes, cuatro peticiones formales, dos refugues por usar l’asturianu y una resolución del Conseyu de Tresparencia ensin cumplir. Esa ye la situación que denuncia un vecín d’Illas tres intentar acceder a un espediente municipal que, según sostién, podría revelar posibles irregularidaes na xestión d’una espropiación venceyada a un depósitu d’agua y qu’afectaría directamente al alcalde del conceyu.

Documentu de la Comisión de Tresparencia nel qu’afalen a presentar la documentación requiría

El casu arrinca’l 3 de xunu de 2024, cuando’l vecín solicita per primer vegada l’accesu al espediente municipal al sospechar una posible actuación fraudulenta o incluso un presuntu casu de prevaricación rellacionáu con una espropiación de terrenos. Según denuncia, nun recibió nenguna rempuesta per parte del Conceyu d’Illas.

Tres meses dempués, el 9 de xunetu de 2024, torna presentar la mesma solicitú. Nesta ocasión sí recibe contestación, anque negativa. El Conceyu refuga facilitar la documentación argumentando que la petición taba redactada n’asturianu, una decisión nidiamente contraria a la Llei d’Usu y a la normativa vixente sobre los derechos llingüísticos de la ciudadanía.

Ante esta situación, en febreru de 2025 presenta una reclamación énte’l Conseyu de Tresparencia y Bon Gobiernu de Madrid. Sicasí, l’organismu desestima la reclamación al considerar escesivu’l tiempu trescurríu dende la negativa municipal hasta la presentación del recursu.

L’afectáu decide entós volver entamar el procesu y presenta una tercera solicitú d’accesu al espediente énte’l Conceyu d’Illas. Tres la nueva negativa municipal, torna acudir al Conseyu de Tresparencia, esta vegada dientro de plazu.

La resolución definitiva llega’l 20 de marzu de 2026. El Conseyu de Tresparencia estima la reclamación del vecín, da-y la razón y ordena al Conceyu d’Illas facilitar l’espediente solicitáu nun plazu de venti díes hábiles. Nel mesmu fallu, l’organismu recueye tamién la protesta pola discriminación llingüística sufrida, ensin poner nengún reparu al fechu de que les solicitudes tuvieren redactaes n’asturianu.

Sicasí, según denuncia’l vecín, el Conceyu d’Illas ignoró hasta’l día de güei la resolución del organismu estatal y nun entregó la documentación requerida nin al solicitante nin al propiu Conseyu de Tresparencia.

Tres superar el plazu establecíu ensin respuesta, el 29 d’abril de 2026 el vecín presentó una nueva reclamación pa qu’el Conseyu de Tresparencia vuelva requerir oficialmente al Conceyu l’entrega del espediente.

A les sospeches sobre la posible irregularidá venceyada al depósitu d’agua súmase agora l’actitú del Conceyu ignorando non solo a los vecinos sinón les resoluciones d’un organismu estatal y refugando l’usu del asturianu na relación cola alministración pública. Los continuos retrasos, silencios y incumplimientos refuercen la impresión de qu’hai daqué qu’ocultar.