La Coordinadora Ecoloxista d’Asturies manifestó’l so refugu a la decisión de la Conseyería de Ciencia d’autorizar el proyectu d’investigación minera La Collada Fase 2, promovíu pol grupu Minersa nos conceyos de Xixón y Siero y espublizáu esti día nel BOPA. La resolución permite la realización de 31 nuevos sondeos venceyaos a la continuidá de la esplotación de fluorita de La Viesca.

Zona na que se plantega ampliar la mina

Dende la Coordinadora Ecoloxista critícase que l’alministración autonómica nun tuviere en cuenta les alegaciones presentaes tantu pola propia organización como polos vecinos afeutaos, qu’aportaron 219 alegaciones, amás de les presentaes pol Conceyu de Xixón y distintes asociaciones que manifestaren la so oposición al proyectu.

L’organización ecologista considera especialmente llamativu que la empresa solicite nuevos sondeos nuna zona densamente poblada cuando ella mesma reconoz contar yá con abondosa información xeolóxica procedente d’investigaciones anteriores. Según recuerden, na zona realizáronse yá 81 sondeos en La Collada, 50 en La Viesca y 27 na Camocha, a los que se sumen otros 21 executaos nel añu 2024.

La posible ampliación de l’actividá minera afecta a numberoses parroquies y nucleos rurales de Xixón y Siero. Nel conceyu xixonés señálense zones como Porceyo, Granda, La Camocha, Ruedes, Caldones, Baldornón, Fano, La Pedrera, Robledo o Arroyo. Nel casu de Siero, les afecciones llegaríen a Güergo, Florida, Varé, Los Pisones, San Tirso, Palmianu, La Madera, Grandarasa, La Calabaza, Muñó, Casanula, Ceñal y La Collada, ente otros nucleos.

La Coordinadora recuerda amás los antecedentes de la mina de La Viesca cuando taba en funcionamientu, una etapa na que, según indiquen, los vecinos denunciaren ruidos, vibraciones nes viviendes y vertíos sólidos nos cauces de la zona, amás del impactu provocáu pol tráficu continuu de camiones sobre la rede viaria local. Según denuncien, les reclamaciones y denuncies presentaes polos residentes siguen ensin resolvese por parte del Gobiernu d’Asturies.

Dende’l colectivu ecoloxista considérase que’l Principáu “nun pue siguir siendo cómplice” d’actividaes mineres ensin actuar frente a les consecuencies ambientales y sociales que provoquen nos entornos rurales onde se desarrollen. La organización reclama una mayor valoración del impactu a mediu y llargu plazu que supon la perforación del subsuelu y les sos consecuencies sobre’l futuru del territoriu y de les poblaciones afeutaes.