El desfiuciu d’una ma y la so fía menor d’una vivienda pública de Vipasa en Nuevu Roces, dau a conocer pol Sindicatu d’Inquilines, abre l’alderique sobre la procedencia d’executar desafiucios en vivienda protexida cuando concurren situaciones de vulnerabilidá social acreditada.

Viviendes de proteición en Nuevu Roces

La sentencia dictada tres el xuiciu celebráu’l pasáu 23 d’abril resulta favorable a Vipasa ya insta a la inquilina a abandonar la vivienda, anque la resolución entá pue recurrise en apelación. Según esplicó’l sindicatu, la afectada ye una muyer víctima de violencia machista, con una fía de nueve años escolarizada nel barriu y unos ingresos que “malpenes superen los mil euros mensuales”.

El principal elementu de discusión nun ye tanto’l procedimientu xudicial como’l contestu social nel que se produz. Distintes organizaciones lleven años reclamando que les empreses públiques de vivienda incorporen criterios sociales más amplios antes d’executar desallugos, especialmente cuando hai menores implicaos o situaciones de violencia de xéneru.

Dende’l sindicatu sostiénse amás que la muyer queda “dafechu fuera del mercáu priváu del alquiler” cola so capacidá económica actual y qu’esa situación complícase entá más pola delda acumulada, que podría torgar l’accesu a otra vivienda pública. El sindicatu reprocha al Principáu l’incumplimientu de la promesa de “nun desagospiar a naide más d’una vivienda pública”. El parque públicu nació precisamente pa responder a situaciones de dificultá económica o esclusión residencial, polo que distintos colectivos consideren improcedente que les alministraciones acaben actuando como un gran propietariu más.

Esti tipu de procedimientos lleguen amás nun momentu especialmente delicáu nel accesu a la vivienda. L’encarecimientu de los alquileres y la escasez d’oferta faen que munches families con ingresos baxos tengan prácticamentes imposible atopar una alternativa habitacional nel mercáu priváu. Nesi contestu, les entidaes sociales reclamen mecanismos de mediación, alquileres adaptaos a renta o planes d’acompañamientu antes d’allegar a midíes como’l desfiuciu.

El casu llamó tamién l’atención d’Amnistía Internacional, que yá ta colaborando activamente nel estudiu de la situación. 

This work is licensed under a Creative Commons Attribution 4.0 International License.