Mapa aéreu de la zona afectada poles bateríes en Cualloto

Los parques de bateries plantegaos pol ‘Principado’ exceden de llargo les necesidaes reales d’almacenamientu pal consumu del territoriu asturianu

El Gobiernu d’Asturies sigue avanzando na tramitación de parques de bateríes nel territoriu, nuna dinámica que cada vez xenera más inquietú social. Esta selmana’l BOPA recueye la espublización d’un nuevu proyectu na zona de Granda, en Siero, mui cerca de Cualloto, nuna espiral d’autorizaciones enerxétiques que ta llamando poderosamente l’atención.

Esti nuevu parque prevé la instalación de tres contenedores de bateríes en suelu urbanu y convertiríase nel sestu proyectu d’esti tipu nel conceyu de Siero, onde yá hai cuatro autorizaos pa la so construcción, a pesar de la oposición vecinal manifestada nos últimos meses.

Especialmente polémicu ye’l casu d’Uviéu, onde’l Principáu sigue impulsando parques en zones non urbanizables como Los Arenales. La Conseyería de Ciencia, Industria y Emplegu autorizó unu d’estos proyectos ensin atender les alegaciones presentaes. Nel casu concretu d’esta zona, rexistráronse más de 350 alegaciones de vecinos y vecines de barrios como Los Arenales, La Manjoya, Covadonga, La Brañella, El Calderu, El Bosque, Les Cruces, La Granda, Vidayán, Fitoria o San Lázaro, que s’oponen a la instalación de varios parques con hasta 93 contenedores a menos de 150 metros de viviendes, esplotaciones ganaderes y equipamientos como un xeriátricu.

Esta situación contrasta colos criterios marcaos en 2024 pola Comisión d’Urbanismu y Ordenación del Territoriu d’Asturies, que establecía distancies mínimes de 1.000 metros a núcleos rurales y de 500 metros a instalaciones ganaderes. Sicasí, los nuevos proyectos nun siempres cumplen estes condiciones, lo que xenera sorpresa y maltar ente la población afeutada.

La proliferación d’estes instalaciones resulta especialmente significativa si se compara col consumu eléctricu actual y les previsiones futures, bien alloñaes del compromisu inicial de llindar la capacidá d’almacenamientu a 300 MW. lo que lleva inevitablemente a entrugase de quién va ser Asturies la ‘pila’ xigane.

Una de les principales preocupaciones de colectivos vecinales y sociales ye la cercanía d’estos parques a les viviendes. En munchos de los proyectos plantegaos, la distancia ente los contenedores de bateríes y los núcleos habitaos ye mínima, lo que, según denuncien, podría provocar una importante contaminación electromagnética que afectaría tanto a la vecindá como a los animales. Dalgunos estudios apunten a que la esposición prolongada a campos electromagnéticos podría aumentar el riesgu de determinaes enfermedaes, como distintos tipos de cáncer, lo que incrementa la preocupación social.

Amás, los riesgos venceyaos a esti tipu d’instalaciones en casu d’incidente son considerables. Les fugues térmiques o los incendios en bateríes de ión litiu pueden tener consecuencies graves ya irreversibles. Les sustancies que se lliberen nestes situaciones son irritantes, corrosives y altamente tóxiques, afectando tantu a la salú humana como al mediu ambiente. La estinción d’estos fueos, amás, presenta dificultaes téuniques, y l’usu d’agua —consideráu’l métodu más eficaz— podría xenerar contaminación d’importantes volúmenes d’esi recursu.

El mapa actual de proyectos n’Asturies ye ampliu y en constante crecimientu. Na actualidá, conócense polo menos 87 iniciatives repartíes por distintos conceyos como Salas, Grandas de Salime, Siero, Llanera, Mieres, Cangues d’Onís, Uviéu, Avilés, Corvera, Ḷḷena, Colunga, Villaviciosa, Soto Ribera, Les Regueres, Xixón, Candamu, Gozón, Piloña, Grau, Carreño, Cangues del Narcea, Llangréu, Ribedeva, Ribeseya o Samartín del Rei Aurelio, con dimensiones que van dende un únicu contenedor hasta instalaciones con decenes d’ellos.

A esti contestu súmase otra cuestión que ta siendo oxetu de crítica: la fragmentación de proyectos por parte d’un mesmu promotor. Esta práctica, que consiste en dividir una gran instalación en varios parques más pequeños con tramitaciones independientes, podría aumentar l’impactu real ensin que se valore de manera conxunta.

En definitiva, la rápida espansión de los parques de bateríes n’Asturies ta abriendo un alderique cada vegada más intensu ente la necesidá de desendolcu enerxéticu y la protección del territoriu, la salú pública y el mediu ambiente.