La nueva llei facilitará la cellebración de conciertos en chigres
La Xunta Xeneral del Principáu d’Asturies vien de dar un pasu relevante na regulación de la música en directo cola aprobación d’una modificación de la Llei d’Espectáculos Públicos y Actividaes Recreatives que facilita los conciertos de pequeñu formatu
El cambéu llegal va permitir que establecimientos d’hostelería ensin llicencia específica pa espectáculos puedan acoyer actuaciones musicales de pequeñu formatu. Pa ello, va bastar con presentar una declaración responsable y comunicar l’actividá al conceyu correspondiente con un mínimu de 48 hores d’antelación. Trátase d’un mecanismu más flexible que’l modelu anterior, que na práutica torgaba munches actuaciones en directo por mor de la esixencia de permisos más complexos.
Esta reforma vien dar respuesta a una vindicación histórica del sector cultural asturianu, especialmente de músicos y pequeños llocales que víen llindaes les sos posibilidaes de programación.
La iniciativa salió alantre con un ampliu consensu políticu: tolos grupos parllamentarios votaron a favor, sacante Vox, que se desmarcó del alcuerdu. La tramitación fixose pel procedimientu de llectura única, una vía que s’usa cuando hai un altu grau d’alcuerdu y necesidá d’axilizar l’aprobación.
La norma contempla que estes actuaciones puedan celebrase tanto en espacios interiores como esteriores, incluyendo terraces o merenderos, siempres que se cumplan una serie de condiciones orientaes a garantizar la convivencia. Ente elles, destaca la desixencia de caltener una distancia mínima de 40 metros respecto a zones residenciales, una midida pensada pa evitar conflictos colos vecinos.
En rellación colos horarios, afítase una franxa xeneral que va dende les diez de la mañana hasta les once de la nueche. Sicasí, esta llende podría flexibilizase nos casos de llocales que cuenten con sistemes d’insonorización afayaizos, lo que dexa compatibilizar la actividá cultural col descansu vecinal.
La modificación llegal abre agora la puerta a recuperar una tradición bien arraigonada n’Asturies: la música en directo en chigres, bares y pequeños escenarios de proximidá. Amás del so valor cultural, esta actividá tien tamién un impactu económicu positivu, al dinamizar l’hostelería y favorecer la creación d’un texíu cultural más ricu y diversu.
This work is licensed under a Creative Commons Attribution 4.0 International License.
