L’Andecha Folclor d’Uviéu va presentar esti próximu vienres 25 d’abril el documental Y agora que lo baillen los rapacinos: lo Llixero n’Asturies, una nueva producción centrada na recuperación y divulgación del baille tradicional asturianu. 

El trabayu, que va estrenase’l 25 d’abril a les seis de la tarde na Sala 1 de Cines Embaxadores d’Uviéu,  parte de la tercer entrega del Cancioneru l’Andecha: lo llixero n’Asturies, una publicación singular dientro de los estudios sobre folclor, al tratar un de los pocos cancioneros analizaos dende la perspectiva del baille tradicional. La obra afonda nel conocimientu de los bailles a lo llixero n’Asturies, estudiando los nomes colos que se conocen nes distintes comarques, les formes de baillalos según la zona, la disposición de los bailladores y los sones utilizaos pa acompañalos.

El documental fai un percorríu visual y musical per esti xéneru tradicional, visitando escenarios representativos de les distintes zones d’Asturies onde inda se caltién viva esta manera de bailar. La producción combina pieces instrumentales con otres interpretaes y baillaes por miembros de L’Andecha, amás d’archivos audiovisuales procedentes del trabayu de campu realizáu pol colectivu a lo llargo de los años.

Con esta propuesta, L’Andecha Folclor d’Uviéu vuelve amosar el so compromisu cola investigación, la recuperación y la tresmisión del patrimoniu inmaterial asturianu, acercando al públicu formes culturales que durante munchu tiempu quedaron arrinconaes o poco visibles.

La producción corre al cargu de Cuatro Gotes Producciones y contó col sofitu de la Consejería de Cultura, Política Llingüística y Deporte del Principado de Asturies.

L’estrenu d’esti vienres supón una nueva oportunidá pa redescubrir una parte esencial de la cultura popular asturiana y comprobar cómo la tradición sigue viva cuando pasa de xeneración en xeneración. Tal y como anuncia’l títulu, agora toca que lo baillen los rapacinos.