Villaviciosa foi l’escenariu de la presentación oficial de la XXXIII edición del Campeonatu Oficial d’Echaores d’Asturies, una cita yá imprescindible nel calendariu sidreru del país. L’actu desarrollóse na sede del Conseyu Regulador de la DOP Sidra d’ Asturies, onde se dieron a conocer les novedaes d’esta temporada y el calendariu completu de pruebes.

Nel actu intervinieron el xerente del Conseyu Regulador, Daniel Ruiz; el presidente de la Asociación de Escanciadores de Asturias, Saúl Moro; l’alcalde de Villaviciosa, Alejandro Vega; y el responsable de la oficina local de Caja Rural de Asturies, José Ramón Alonso.

Tamién acudieron representantes del sector sidreru y del campeonatu, ente ellos Llucía Fernández pola revista LA SIDRA, l’actual campeón Salvador Ondó, les echaores Alejandra Vanegas, Isabella Padrón y Sandra Martínez, amás de los xueces Abraham Castellanos y Nicolás Expósito. Per parte de Caja Rural d’Asturies tuvo presente tamién Martín Lebón, responsable del área agraria.

Dende les instituciones collaboradores destacóse la importancia d’esta competición como ferramienta pa caltener viva una de les señes d’identidá más reconocibles d’Asturies. Tanto l’Ayuntamientu de Villaviciosa como Caja Rural reafitaron el so sofitu a un certame que combina tradición, profesionalidá y promoción cultural.

El XXXIII Campeonatu va contar con 18 pruebes repartíes por tol país. La principal novedá nel calendariu ye la incorporación d’una nueva cita n’Argüeru, prevista pal mes d’agostu en fecha entá por concretar.

Aparte d’esa, la edición d’esti añu incorpora otres novedaes relevantes. Una d’elles ye la participación de Lorena Alonso, responsable técnica del club de productu Sidraturismu Asturies, que va encargase de presentar les distintes pruebes y reforzar la difusión del campeonatu al traviés de les redes sociales.

Laura Ovín va presidir un xuráu integráu por cuatro campeones históricos, con un suplente adicional, que van tener la responsabilidá de valorar la técnica y precisión de los concursantes.

Amás, estudiaráse reconocer de manera especial a la sidrería vencedora en cada prueba y premiar con diploma al segundu y tercer clasificáu de la categoría Sub 25, que cuenta col patrociniu de la revista LA SIDRA.

La competición va arrancar esti próximu sábadu 24 d’abril en La Felguera y depués va percorrer conceyos y localidaes como Cabranes, Llanera, Gascona, Mieres, Nava, Lugones, Navia, Llanes, Tapia de Casariego, Xixón, Corvera, Pola Siero, Villaviciosa, Ribesella, Les Arriondes, finando como ya ye vezu en Colunga.

Con tolo ello, el Campeonatu Oficial d’Echaores vuelve preparase pa recorrer Asturies reivindicando l’arte d’echar sidre como patrimoniu vivu y una de les espresiones más singulares de la cultura asturiana.

This work is licensed under a Creative Commons Attribution 4.0 International License.