El sindicatu SUATEA denunció la situación “incaltenible” que traviesa’l colexu públicu de Latores y reclamó a la Conseyería d’Educación midíes urxentes pa garantizar unes condiciones dignes nel centru.

Dende la organización sindical amuesen el so “fondísimu esmolecimientu” poles condiciones actuales del colexu, que consideren inadecuades p’asegurar una educación de calidá. Nesti sentíu, critiquen lo que califiquen como un abandonu de la enseñanza pública frente al aumentu progresivu de la inversión na rede concertada.

El centru, construyíu na década de los años 70, arrastra —según SUATEA— importantes deficiencies estructurales que nun fueron resueltes coles actuaciones realizaes hasta agora. Les intervenciones, señalen, resultaron insuficientes y caltiénense problemes graves d’infraestructura que repercuten direutamente nel alumnáu y nel profesoráu.

Ente les principales carencies, el sindicatu destaca la masificación del alumnáu, con ratios elevaes y espacios que nun tán preparaos pa acoyer grupos grandes. Tamién denuncien la utilización de divisiones provisionales ente clases, con problemes de ventilación y lluminosidá, asina como l’usu d’espacios non habilitaos como aules, ente ellos antiguos cuartos de llimpieza.

Amás, apunten a la saturación nos accesos y salíes del centru, cola presencia de más de venti autobuses dientro del recintu, lo que provoca retrasos y amenorga’l tiempu efectivu de les clases. A ello súmase la falta d’espaciu pa atender adecuadamente al alumnáu con discapacidá motora, que —según denuncien— acaba siendo deriváu a otros centros, mayormente de la rede concertada.

Otres deficiencies señalaes son la escasez d’instalaciones, que obliga a desenvolver actividaes en pasillos o zones non adecuaes, y la fragmentación de servicios básicos como’l recreu o’l comedor, que tienen d’organizase por turnos pola falta de capacidá.

Pa SUATEA, esta situación pon de manifiestu una planificación educativa “deficiente” y una falta d’inversión sostenida na rede pública. El sindicatu considera “inaceptable” que se caltengan estes condiciones y reclama a la Conseyería d’Educación una respuesta inmediata.

En concretu, esixen l’ampliación o construcción de nueves instalaciones, la baxada de ratios y una planificación que garantice espacios educativos “dignos, inclusivos y afayadizos” pa tola comunidá escolar.