- Oi, nin, ¿vas dir a la mani polos despidos de ***? Ye que nun te vi na de les 6 de La Suiza, nin na de vivienda, nin na de Sanidá Pública… ¿Pásate daqué o qué?
- Quiá, quita pallá. Comu p’andar con toscaes, cola que ta cayendo.
- ¿La que ta cayendo?…¿pues concretame’l parte meteorolóxicu l’apocalipsis?
- Home, ¿pero tú nun ves les noticies? Los yanquis bombardeando, el pederasta secuestrador esi xintando neños y mangoneando’l mundiu, Palestina masacrao, los kurdos, Cuba, Irán… ¡La guerra mundial a piques d’entamar! y tú esmolecíu por unos cientos de despidos!
- ¿Sabrás a qué hora entama? Pa organizame.
- Nun te rias que ye serio.
- Nun ye coña ho, ye pa saber si ye anantes o dempués de la concentración de mañana.
- Ye que sois mui básicos. Pensáis en lo pequeño. Lo que pasa nel mundiu aféctanos a toos, manin. Solidaridá internacional ye lo que te falta.
- Bono… si lo pienses… razón nun ties. Dende Asturies igual nun paramos la OTAN, eso ye verdá. Mete un poco mieu tou esto, sí.
- ¿Un poco? ¡Mieu ye pocu! ¡Esto ye l’acabose! ¡La fin de la civilización occidental! Nun ye momentu pa caxigalines.
- Coime… si que me lo pintes feo. Entós, ¿véote na concentración pro Palestina? ¿Tas en dalguna plataforma? ¿Firmaste daqué manifiestu? ¿Sabes si hai entamaes movilizaciones pol casu Epstein?
- Quita pallá, ho. ¿Plataformes? Bastante plataforma ye’l colchón, que casi nun lu veo. ¿Nun sabes qu’echaron a la muyer del trabayu? Y yo a dobles turnos por cuatro perres, eh, nun vaigas creyer que me forro. Y pa enriba salgo de trabayar y tardo dos hores en llegar porque hai un argayu que tien la carretera fecha un cristo.
- Vaya…
- Y espera, qu’hai más. Teo a mio pá malu en casa, esperando que-y aprueben lo de la dependencia. Nin ayuda a domiciliu, nin na. La mio vida ye un desastre, nun me da nin pal alquiler, cualquier día échenmos de casa y somos cinco, que los rapacinos viven tovía con nosotros, con cuasi 30 años que tien el mayor.
- Entós ¿Ye guerra mundial o ye que tas reventáu?
- Tamos reventaos, nin gracia pa moveme teo.
- Eso sí que ye una pandemia. Tira pa dientro, vamos tomar unes.
This work is licensed under a Creative Commons Attribution 4.0 International License.
