La política llanisca vien de dar un espectáculu de cosmopaletismu nivel máximu. Los miembros de Vecinos x Llanes (VxLlanes) enviaron al presidente Barbón una carta redactada íntegramente en catalán, cola excusa de que “en castellano no nos atiende”. Esta decisión, más allá del mensaxe políticu que pretendieren tresmitir, ye un exemplu claru de hasta onde ta dispuestu a llegar dalgún políticu pa evadir l’usu de la llingua propia, priorizando cualisquier idioma forasteru sobre l’asturianu.

L’agrupación VxLlanes, cuyes sigles remembren non casualmente a otru partíu de calter estatal, preséntase como un proxectu políticu municipalista comprometíu col bien común y cola participación de los vecinos, que promete dar respuesta a los problemas del día a día. Na so web afirmen que la so forma d’entender la política tien en cuenta “a la xente del conceyu”.

Sicasí, na práctica, cuando toca escoyer idioma pa expresase oficialmente, VxLlanes prefiere l’español en primer llugar y cuando quier destacar, opta pol catalán. El mensaxe pa la ciudadanía nun pue ser más direutu: la llingua de Llanes y d’Asturies nun tien valor.

La estratexa llingüística emplegada ta nidia: busca atraer notoriedá y reclamar atención oficial usando una llingua ayena, al tiempu que ridiculiza lo propio. Demuestra un despreciu explícitu pola llingua propia y un cosmopaletismu de manual: aparentar modernidá y “universalismu” mientras se ignora la identidá cultural local.

Ye tamién evidente que, de pasu, se pretendíe marcar cierta preferencia pola atención oficial hacia quien fala catalán, dando a entender que parlant catalán tase meyor atendíu. Entendiéronlo too mal. Los que de verdá son meyor atendios nun son los que falen catalán, sinón los que utilicen la llingua propia y defenden la so identidá.

Llucía F.Marqués

This work is licensed under a Creative Commons Attribution 4.0 International License.