Skama La Rede celebra dos décades con un vinilu conmemorativu y un llibru que repasa la so hestoria

Mañana, sábadu 13 d’avientu, na llibrería Matadero Uno, asitiada na Plaza de Riego d’Uviéu los siguidores de Skama La Rede tienen una cita ineludible, de magar les 19.00 hores; allí, el grupu va presentar el so nuevu proyectu, un discu-llibru en formatu vinilu col que conmemoren venti años de xera musical.

Esti trabayu, entituláu “20 años”, inclúi ocho cantares inéditos y una serie de collaboraciones con vocalistes y músicos de renome dientro de la escena rock y punk asturiana y estatal. Nél participen Pirri (Escuela de Odio), Ramón Blanco (Los Berrones), Daviz Rodríguez (Mala Reputación), Humber (Misiva) y Raquel (Ochobre).

Con esti proyectu, Skama La Rede suma’l so quintu trabayu d’estudiu, darréu de «La nuesa hestoria» (2005), «Echaos a la mar» (2007), «Ye too mentira» (2010) y «Avante» (2014). Nesta ocasión, la edición y distribución fízose dende la propia banda, en réxime d’autoxestión.

Xunto col vinilu, el llanzamientu acompáñase d’un llibru d’unes trenta páxines que repasa la trayeutoria de la banda dende los sos entamos, con testos de voces conocíes del panorama musical: David Artime «Roxu», Xune Elipe, Xicu Ariza, Natalia González, Nuno Feliz o Gabri Reigosa, ente otros. El material complétase con semeyes, recortes de prensa y documentos que dibuxen el percorríu creativu del grupu a lo llargo d’estes dos décades. Tres la estrena n’Uviéu del formatu físicu, la obra va tar disponible pa descargase en versión dixital a partir del llunes 15 d’avientu nes principales plataformes musicales.

El diseñu del paquete foi encargáu a Alfonso Zapico, al traviés d’«A Sangre Estudio Gráfico», mientres que les grabaciones tuvieron llugar en «Tutu Estudios», en Corvera, baxo la producción musical de Sergio Rodríguez.

Susana Sela