¿Cuanto s’entarda en lleer 18.000 nomes? a un segundu por caún sedríen 300 menutos, cincu hores. Albidramos que sedrán enforma más, repartios en dellos díes qu’entamarán mañana colos primeros 1.800. Un homenaxe nel que, nome a nome, reconoceráse la esistencia concreta de caún de los cuasi venti mil rapacinos asesinaos en Palestina
Mañana sábadu, once d’ochobre, el Centru Niemeyer d’Avilés acoyerá un actu d’enfotu y cargáu de significáu. De magar les once la mañana, más de sesenta colectivos sociales, culturales y humanitarios participarán nuna acción simbólica y de denuncia que va entamar con una concentración na Plaza d’España d’Avilés. Dende ellí, los participantes avanzarán en silenciu, llevando piqueñes mortaxes blanques que representen a les víctimes, hasta llegar al Centru Niemeyer, onde dará comienzu una llectura pública de 1.800 nomes de los más de 18.000 neños y neñes palestinos asesinaos pol exércitu d’Israel nos dos caberos años.
L’actu foi presentáu esti xueves, xusto’l día nel que’l mundu esconsoñaba col anunciu d’un posible alcuerdu de paz ente Israel y Hamas, anque los bombardeos y los ataques siguíen ensin dar treguaesa mesma mañana.
La iniciativa pretende poner nome y voz a les víctimes, humanizando’l que munchos consideran el mayor crimen d’esti sieglu. Los organizadores dixeron que lo que ta pasando «nun ye una guerra, sinón un xenocidiu», y que, malpenes de los movimientos diplomáticos, «urxe un altu’l fueu, la entrada inmediata d’ayuda humanitaria darréu y un procesu real de paz y xusticia».
Amás, recalquen que lo que pasa en Palestina “nun ye un problema llonxanu nin d’otru pueblu, sinón una cuestión que nos implica a toos: lo que ta en xuegu ye qué mundu queremos construyir y si la impunidá va siguir marcando les normes internacionales”.
La llectura nel Niemeyer ye solo’l primer pasu d’una serie d’actos que se van celebrar nos próximos díes y selmanes, hasta completar la llectura de los más de 18.000 nomes de los menores víctimes de los ataques. Nome a nome, voz a voz, van dir faciendo visible’l rostro humanu del dolor, una cadena de memoria y conciencia que pretende que’l mundu nun vuelva mirar pa otru llau.
Nel Dos Santos
This work is licensed under a Creative Commons Attribution 4.0 International License.
