El Salón Internacional de les Sidres de Gala (SISGA) da un pasu hestóricu col so estrenu en Xapón.
La cita, referente mundial nel sector, celébrase esti añu tamién en Tokio, onde productores y distribuidores van conocer de primer mano la Cultura Asturiana de la Sidra, la calidá y la diversidá del mercáu sidreru, incluyendo delles marques asturianes El Salón Internacional de les Sidres de Gala (SISGA) vive un momentu hestóricu: per primer vez, y coincidiendo col so 15º aniversariu, sal del so allugamientu avezáu en Xixón pa cellebrase tamién en Xapón. La cita, que tendrá llugar el 31 d’agostu de 2025 nel Kanda Myojin Hall de Tokio -un mes enantes del SISGA Xixón- va estrenar la marca SISGAJapan y busca abrir una nueva etapa pa la proyeición internacional de la sidra. Nacíu en 2010, el SISGA consolidóse como un referente mundial: cada añu convoca a productores de más de 15 países y otorga premios col reconocimientu d’un xuráu independiente. Pero la cita ye muncho más qu’un concursu. Al traviés de tasties, foros y xornaes d’alderique, convirtióse nuna plataforma d’anovación, intercambiu y promoción cultural, que da a la sidra un altor internacional y la presenta como un productu gourmet, variáu y en constante evolución. La esbilla de Tokio pa esti primer SISGA fuera de les nueses fronteres nun ye casualidá. Nel postrer deceniu, la producción sidrera nipona medró tanto en calidá como en volume, sorprendiendo a los especialistes pol so cuidu y orixinalidá, al tiempu que s’abre un puxante mercáu pa la sidra de tol mundu, onde la sidra asturiana yá ta faciéndose espaciu. Cola edición xaponesa, el salón tiende pontes ente dos territorios que comparten una visión artesana y cultural de la sidra: Asturies y Xapón. Al mesmu tiempu, la cita abre nueves posibilidaes pa un mercáu asiáticu que demanda productos europeos de calidá, con hestoria y raigañu. El Kanda Myojin Hall, emblemáticu recintu de la capital nipona, acoyerá un programa pensáu p’acercar la cultura sidrera al públicu xaponés. La xornada inclúi tasties a ciegues, zones de degustación, maridaxes con cocina asturiana y xaponesa, talleres abiertos al públicu, conferencies especializaes y un espaciu de networking pa profesionales del sector. Como ye tradición, el momentu de mayor emoción sedrá la entrega de premios a les meyores sidres del certame. Ún de los atractivos d’esta edición va ser la presencia destacada de productores asturianos y la presentación, per primer vez en Xapón, del ritual d’echar la sidra. Declarada la Cultura Sidrera Asturiana Patrimoniu Cultural Inmaterial de la Humanidá pola UNESCO, esta práctica va amosase en vivo con demostraciones y talleres. Una ocasión única pa que’l públicu nipón conozca la simboloxía y l’espíritu d’hospitalidá que lleva implícitu esti xestu tan propiu d’Asturies. Sicasí, el protagonismu nun queda n’Asturies y Xapón. Francia, Irlanda, Alemaña, Chequia y otros países productores van tar tamién presentes, lo que refuerza’l papel del SISGA como verdaderu foru mundial de la sidra. Pa los productores, la cita supón un escaparate privilexáu nun mercáu qu’aprecia la escelencia y la conexón col territoriu. Y, p’Asturies, representa la oportunidá d’afitar la so condición d’epicentru internacional de la sidra. Del 25 al 28 de Setiembre, el SISGA tornará a Xixón cola so décimo quinta edición.
Llucía F. Marqués
This work is licensed under a Creative Commons Attribution 4.0 International License.
