Llucía F. Marqués
La prensa espubliza los datos de salarios medios n’Asturies y les redes revienten. “¿Quién se queda cola metá de lo mio?”
Nuna Asturies de máxima precariedá llaboral, onde cerca’ l ’80% de los emplegos tán venceyaos al sector servicios (datos del Sadei) y más de 40.000 families dependen d’un ridículu IMV, cuando la pensión non contributiva de xubilación n’Asturies ye de 482,70 € mensuales, y la d’invalidez de 527,32 €, dicir que los asturianos ganen de media 2.668 € al mes oscila pente la burlla y la ofiensa. Y nun ye que seya un salariu desaxeráu, si cuntamos col preciu de la vivienda y el xorrecimientu xeneral del coste de la vida, pero ye que pa la gran mayoría de los asturianos ye una cifra inalgamable. Asina, les redes españen énte esa noticia “¿Quién se quedó colo mio?” “¿Onde tán los mil euros que me falten?” “El mio vecín comió un pitu y yo miraba, la media diz que comimos mediu pitu caún” son dalgunos de los mensaxes colos que la xente retruca a esta noticia. En realidá esti datu lo qu’espeya ye la fonda fendedura salarial qu’esiste pente la inmensa mayoría que cobren los 1.184 € raspiaos del SMI y los que ganen abondo como pa subir la media a más del doble. Por exemplu, el nuesu presidente que, con 14 pagues de 5.370 €, gana él solu 4,’5 Salarios Mínimos Interprofesionales. 
This work is licensed under a Creative Commons Attribution 4.0 International License.
