La organización soberanista Andecha Astur espresó la so fonda satisfacción pola escoyeta de Pin como figura homenaxeada nel Día de les Lletres Asturianes 2025, n’un reconocimientu que consideren más que merecíu a la so trayeutoria lliteraria, militante y vital.
Pin, nome col que se conoz a Xosé Álvarez Fernández, escritor y activista, foi miembru históricu d’Andecha Astur y llegó a ser candidatu en delles convocatories eleutorales pola formación. El so llabor como autor en llingua asturiana xúnese a una vida dedicada al compromisu social, la defensa de la llingua y cultura d’Asturies, y la llucha pola soberanía’l país.
Dende Andecha Astur destaquen que “l’homenaxe a Pin supón un xustu reconocimientu a una figura que supo xunir la creación lliteraria cola conciencia política, ensin renuncies y con una fidelidá firme al pueblu asturianu”.
Conocíu tamién como ‘Pin el de Madrid’ o ‘Pin el de Cigüedres’, Xosé Álvarez foi dirixente del Conceyu d’Asturies de Madrid, el grupu de mozos y moces emigraos nos años 70 y 80 que dende ellí fixeron un llabor descomanáu d’activismu cultural y llingüísticu de gran influyencia dientro d’Asturies.
Amás, la organización recordó que Pin foi unu de los impulsores de la presencia del asturianu nos espacios populares y reivindicativos, y que “convirtió les pallabres en ferramientes de dignidá y de resistencia” revindicando el papel de la lliteratura al serviciu d’un país llibre y xustu.
Con esta escoyeta, el Día de les Lletres 2025 toma un significáu especial pa los sectores más comprometíos col asturianismu políticu y cultural, y abre la puerta a visibilizar figures que combinaron creación y llucha.
Llucía F. Marqués
This work is licensed under a Creative Commons Attribution 4.0 International License.
