Nun primeru de mayu nel que los sindicatos mayoritarios aconceyaben en Mieres, Xixón acoyía el manifestamientu de les organizaciones más revindicatives pa colos drechos de los trabayadores

Si daqué hai que destacar de la cellebración esti añu del Día de los y les Trabayadores ye la desinformación: nun se vieron malpenes cartelos llamando a la movilización peles cais, cuasique nun se fizo campaña previa, nin panfletos, nin megafonía, sin siquier una campaña fuerte en redes, mails o whatsapp. Sicasí, la población acudió, puntual, a les doce del mediudía a la Plaza l’Humedal, cosciente de la importancia de reclamar drechos y meyores pa la clas trabayadora asturiana. 

El manifestamientu, que partió xuníu de l’Humedal, tuvo sicasí dos finales separtaos, dividiéndose’n dos bloques, un con final nel Náuticu y otru na Plaza’l Parchís, xenerando confusión pente munchos de los asistentes. 

Dende Andecha Astur llamaron a la xunidá de los representantes reales de la clas trabayadora asturiana, dexando fuera d’esi marcu a los sindicatos mayoritarios, a los que consideren cómplices de la clas empresarial y responsables en bona midía de l’actual llaceriosa situación de los y les trabayadores asturianos. “Nesti tiempu d’incertidume, de perda de drechos y de persecución de la llabor sindical ye importante ser coscientes de la necesidá de crear xuntos un marcu asturianu de rellaciones llaborales y caltener un frente propiu y xunitariu de defensa de los nuesos drechos, que tea Asturies comu marcu d’acción y que priorice les necesidaes del pueblu asturianu, ensin por ello dexar de ser solidarios col restu de naciones del mundiu”.

This work is licensed under a Creative Commons Attribution 4.0 International License.