Una prestosa y perinteresante propuesta pa la mocedá que quiera conocer Asturies en tolos sos aspeutos: xeográficos, climáticos, de flora y fauna, xeolóxicos, ecolóxicos, históricos y etnográficos.
Trátase de trece díes —26 pa los más valientes— percorriendo’l cordal en comuña con dalgunos de los más espertos guíes de montaña del país. La propuesta parte del Grupu de Montaña Alandrina y ye de les poques actividaes braniegues enfocaes nesi marxe d’edá —ente 14 y 17 años—. Trátase d’un percorríu d’unos 380 km nel que s’ascienden más de 70 cumes, durmiendo en refuxos y campamentos itinerantes. Ye una esperiencia única que se divide en dos sectores: de Ḷḷeitariegos a San Isidro y, d’ellí, al Alto Campoo, pudiendo facese cualesquier de los dos sectores per separtao o los dos de mou continuu. Sicasí, la so mayor peculiaridá reside n’axuntar l’arruelu col deprendizaxe direutu. Amás de la xeografía y la hestoria qu’esti ambiciosu percorríu lleva implícito, los participantes deprenderán a identificar pol so nome animales, plantes y minerales; conocerán tradiciones, toponimia, téuniques de montaña y seguridá, climatoloxía y curiosidaes. Pero non solo va ser deprender: l’envís ye crear ente los participantes un marcu d’interaición que permita a caún compartir los sos conocimientos ya inquietudes, medrando en comuña. L’actividá desendolcaráse del 1 al 14 y del 16 al 27 de xunetu, y demientres tola travesía dirán guiaos por espertos guíes de montaña ya intérpretes del mediu natural de la Cordalera Cantábrica. Fadrán nueche n’abellugos o en campamentu itinerante, con apoyu de carretera. Pa más información, puen visitase les redes sociales de la A.D. Alandrina, onde tamién se pue atopar información sobre los sos campamentos de branu en Cerulleda, pensaos pa rapacinos de 7 a 13 años. L’asociación nun descarta ampliar la so ufierta con una Travesía del Cordal p’adultos, nel casu de qu’haya demanda.
Llucía F. Marqués
This work is licensed under a Creative Commons Attribution 4.0 International License.
