Entrega de premios del Campeonatu d’Echadores 2024

25 Febreru, 2025

Entrega de premios del Campeonatu d’echadores 2024 El Muséu de la Sidra de Nava acoyó la tarde d’ayeri la entrega de los galardones correspondientes al Campeonatu d’Echadores del añu 2024

Al actu, presentáu por Saúl Moro -Presidente de l’Asociación d’escanciadores- asistieron autoridaes del mundu de la hostelería, la sidra, del Principáu y del Conceyu de Nava. Enantes de la entrega tuvo llugar una ronda d’intervenciones nes que participaron Jorge Ponte Teniente alcalde del Conceyu de Nava-, Víctor Ramos -Presidente DOP Sidra de Asturies-, Javier Martínez, -Presidente d’OTEA- y Marcelino Marcos, -Conseyeru de Mediu Rural y Política Agraria-. Esti postreru aprovechó la ocasión p’anunciar, ensin concretar detalles, la puesta en marcha d’un plan tresañal de proteición y promoción de la cultura de la sidra, iniciativa que va sumase a una inversión de 1,7 millones d’euros del área de Turismu pa impulsar la escelencia gastronómica d’Asturies, na que la sidra ye una de les mayores protagonistes. De siguío, féxose entrega del diploma correspondiente a los diez primeros clasificaos, amás del premiu especial pa la categoría Sub-25, patrocináu pola Revista LA SIDRA y, como novedá, el premiu a la meyor sidrería, que recayó nesta ocasión en La Montera Picona de Ramón. Salvador Ondó, echador en Tierra Astur El Vasco, tuvo per sesta vegada l’honor de llucir la montera d’oru, que-y foi impuesta por Ricardo Ríos, Presidente de la Bona Cofradería de los Siceratores. El diploma qu’acreditaba’l segundu puestu foi recibíu por Wilkin Aquiles, de la Sidrería La Montera Picona y na mesma sidrería quedábase’l tercer puestu, que foi pa Jorge Vargas. Hai que destacar la fuerte presencia de nuevos echadores, con cuatro participantes de la categoría Sub-25 ente los diez primeros clasificaos. Amauris “La Pauta” (Tierra Astur) recibió asina una doble reconocencia, per una parte’l diploma d’octavu na xeneral y, pela otra, el premiu otorgáu pola Revista LA SIDRA al meyor escanciador de 25 años o menos, consistente en troféu, diploma personalizáu y una navaya Vitorinox esclusiva modelu Swiss decorada con motivos sidreros. Siguiéndo-y en dambes categoríes, el so compañeru Alexander Gabriel quedó segundu na Sub-25 y novenu na xeneral, mientres qu’Isabella Padrón (Bodegues Anchón) llograba’l décimu puestu na xeneral y terceru na categoría nueva, siendo la muyer con meyores resultaos del campeonatu 2024. La Montera Picona de Ramón, amás de tener a tres de los sos escanciadores ente los primeros puestos, recibió la reconocencia al Meyor Equipu d’Escanciadores. Tierra rAstur, amás de cuntar colos echaores que ganaron el primer puestu de les categoríes xeneral y Sub-25, asitió a tres d’ellos ente los diez iniciales, recibiendo’l segundu premiu en sidreríes, mientres que la Sidrería El Portal consiguía, colos sos dos concursantes nos diez primeros puestos, el tercer premiu. Enantes de dar per concluyida la entrega, anuncióse en primicia la próxsima emisión del programa ‘Copa Escanciadores’ na TPA pa la próxima temporada del Campeonatu. Al rematar l’actu tuvo llugar una espicha na antoxana del Muséu de la Sidra, na que pudieron tastiase Productos del Paraísu y sidra de Val de Boides, maxistralmente echada por dalgunos de los meyores echadores de la hestoria del Campeonatu.

Nel Dos Santos