Bonos díes, bona xente.
Alborecemos col cielu cubiertu y orpinando con unes temperatures que tan alrodiu de los 7ºC, rexistrándose nel puirtu Payares -0,2ºC.
Güei va dir meyorando’l tiempu durante la mañana pa quedar una tardiquina col cielu poco nuboso o escampláu con unes temperatures que tenderán a subir llixeramente, sobre too les másimes. L’aire sedrá de componente norte con dalguna racha moderada en zones altes ya en puntos del llitoral. Al finar el día surdirán borrinos y nublines no fonderu los valles.
Mañana martes alboreceremos col cielu poco nuboso o escampláu, sicasí tovía tendremos dalgo de borrín nes zones favoretibles con xelaes nun mui xeneralizaes nin fonderes con unes temperatures másimes n’ascensu, mentantu les mínimes descienden moderadamente. L’aire sedrá sele ya variable.
El miércoles veremos más nubes y los prosimos díes hai muncha incertidumbre nel pronóticu, paez que s’anicia una circulación atmosférica retrograda, xeneralizando muncho quier decir que sedrá al revés de lo normal, en vez d’oeste a este como ye vezu va pasar a ser d’oriente a ocidente, apurriéndonos vientos continentales fríos y secos. Pero dende l’otru lláu del atlánticu siempre hai muncha resistencia a esti tipu de circulación y emburria muncho’l chorru polar, soltando pequeñes borrasques que se cuelen ya interautuen dende l’atlánticu faciendo mui difícil una correuta modilización. Taremos sollertes en qu’acaba too esto pero paez que tendremos un febreru con muncho movimientu.
Que paséis un bon llunes collacies ya collacios.
Semeya de Banduxu que mos l’apurre’l nuesu collaciu Paul Coulette
This work is licensed under a Creative Commons Attribution 4.0 International License.
