Bonos díes, bona xente.
” Mañana torna la nieve a la cordelera”
Alborecemos col cielu cubiertu y orpinando con unes temperatures que tan alrodiu de los 9ºC, rexistrándose nel puirtu Payares 2ºC.
Güei vamos tener el cielu cubiertu por nubes baxes que van dexar dalgo d’orpín n’estes primeres hores na metá norte d’Asturies. Yá pela tardiquina dirán abriéndose dellos claros o abancios con unes temperatures n’ascensu, sobre too les mínimes.
Mañana domingu un embolsamientu d’aire fríu n’altor va colase pel norte apurriéndonos precipitaciones xeneralizaes y abondoses, amás nevará copiosamente pela cordelera perriba de los 1300m, baxanado dalgo la cota pela tarde con unes temperatures en descensu ya col aire que va soplar con delles raches moderaes de componente noroeste en zones de montaña ya en puntos del llitoral.
Entamaremos la selmana viniente con sol y bon tiempu pero con fríu peles nueches y l’aborecer ya podríemos finala con muncho fríu y temporal de nieve y agua pero esto yá lu diremos viendo.
Que paséis un bon sábadu collacies ya collacios.
Mañana va complicase abondu les carreteres nos puertos más altos de la cordelera, muncho precuru porque lo de mañana vien sin avisar. Semeya que mos l’apurre’l nuesu collaciu Tomás García Suarez
This work is licensed under a Creative Commons Attribution 4.0 International License.