
Llucía F. Marqués
El presidente del Principado, Adrián Barbón, considera cumplies practicamente toles sos promeses pal 2024. Por supuestu, la oficialidá nun ta siquiera na llista, porque de fechu enxamás la consideró un oxetivu
Adrián Barbón considera executaos dafechu 17 de los sos 25 compromisos pal 2024, con siete en desendolcu y “namás pendiente l’aprobación del Plan Especial de Reforma de l’antigua ciudá de vacaciones de Perlora, en Carreño” como incumplía. Convidovos a toos y toes a valorar dende la propia esperiencia esos cumplimientos.
Revisemos. Primer oxetivu que Barbón considera conseguíu: el retu demográficu. Más d’800 pueblos siguen vacios y ocho de ca diez de los que tan habitaos tienen menos de 30 persones. La natalidá sigue en picáu, l’avieyamientu de la población ye esmolecedor y si nun baxamos del millón de persones viviendo n’Asturies ye pola inmigración. Los cuarenta millones gastaos en recuperación de zones rurales (otru de los puntos) nun vamos discutir que ten gastaos, seique podríemos entrar a valorar en qué y con qué resultaos.
Qu’Adrián Barbón considere conseguío l’accesu a la vivienda pa la mocedá sedría un chiste de nun ser la situación tan grave. Lo mesmo podemos decir de que s’apunte como un tantu la defensa del mediu ambiente, mientres espera por llantar 200 parques de bateríes per tol territoriu asturianu y los vecinos de tola zona central viven en permanente estáu d’alerta por escesu de contaminación, por mencionar dalgunes de les milenta llaceries mediuambientales poles que nun se mueve un deu dende l’alministración.
Los sos “refuerzos contra los incendios forestales”, un de los puntos teóricamente algamaos, suponemos que son les hectárees d’ocalitales que continúa permitiendo y la proteición del Padremuñu Cultural nun teo claro si se refier a dexar cayer decenes d’horros al añu, dexar el prerrománicu en manes de la ilesia o decir unes pallabres guapes sobre la sidre, ensin plantegar nin una sola midía depués de recibir el reconocimientu de la Unesco.
Seguimos, meyora de l’atención sanitaria… que yos entruguen en Jarrio, con un ciruxanu de los siete que tienen asignaos, o a cualisquiera que intentare tener una cita presencial nel mélicu de cabecera nos caberos díes. Nun digo na de la demora nes cites pa especialistes: más de nueve meses nel xinecólogu, mediu añu pa que te vea el traumatólogu una llesión… Polo menos ye sinceru y diz que la meyora de los equipamientos sanitarios “ta en desendolcu”; nun hai más que ver la obra d’ampliación del Hospital de Cagüeñes. La puesta en marcha de Les Escuelines tamién se considera “en desendolcu”.
L’accesu a toles families a la educación universitaria ta según el presidente en camín de solucionase. Ya puede apretar, porque por agora les families asturianes vemos bien complicao aquello del fíu del obreru a la universidá, pero bono, el tien la intención, menos da una piedra.
Seguimos lleendo. “Economía verdi con transición xusta”. Otru chiste prietu, duple nesti casu, porque nin tenemos economía verdi nin pue llamase transición xusta a sacrificar les cuenques por una teórica descarbonización ensin apurrir nin emplegos alternativos nin medios llimpios de xenerar enerxía.
Pendiente ta tamién la estratexa p’afrontar el problema de la soledad non deseyada. Vamos da-y una idega: garantizar condiciones de vida digno pa que la mocedá nun emigre y pueda tar cerca de los sos mayores, y de pasu, solucionamos el primer puntu.
Conseguir la movilidá caltenible (cuestión que Barbón considera fecha) pasaría por unos trenes que furrularen en condiciones, tresporte públicu eficiente, asequible y con suficientes servicios nes zones rurales y que nun mos quiten los descuentos al tresporte porque lo dicen en Madrid. Non, nun ta conseguío.
Tenemos qu’almitir el cumplimientu de dalgunos puntos, comu’l record en turismu, o dalgunos tan ambiguos que son de fácil cumplimientu, como “tar siempres a favor de la igualdá”, que nun pasa de ser una declaración d’intencioes, o la “fuerza pa l’esporte”, lo mesmo que l’estrenu d’equipamientos educativos, ehí damos-y la razón, daqué s’estrenaría.
This work is licensed under a Creative Commons Attribution 4.0 International License.