La Coordinadora Ecoloxista d’Asturies tilda de “indolente y suicida” l’actitú de les alministraciones responsables “que paecen optar por nun tomar les midíes afayadices pa desaniciar la contaminación tres años y más años d’alvertencies”
La organización denuncia énte’l Conceyu de Xixón y la Confederación Hidrográfica los arramaos de toa clase de borrafes -ente ellos peligrosos- al ríu Pisón al so pasu pel polígonu industrial de Mora Garay.
El gran volume de contaminación que s’arrama al ríu Pisón al so pasu pol polígonu industrial non solo provoca un dañu medioambiental irreparable nel calce del propiu ríu, yá bien degradáu polos continuos arramaos, sinón qu’esta contaminación aporta al mar y les corrientes abasnenlo al restu de sableres de Xixón y a les de la mariña de la nala oriental asturiana, col consiguiente impactu nel mediu marín.
Les alministraciones responsables, que son el Conceyu de Xixón, que tien les competencies sobro llimpieza, y el Principáu, que tien les competencies sobro borrafes, nun tomaron midíes pa evitar la contaminación d’estos arramaos nel polígonu, fácilmente apreciables por quien pase pellí.
Dende la Coordinadora Ecoloxista lleven reclamando dende va años que s’adopten les midíes pa solucionar el problema de los arramaos desafranaos. “Tenemos de ser conscientes de la precariedá o inesistencia de depuradores o sistemes de tratamientos d’arramaos nestes instalaciones, neto que del inevitable impactu que xeneren na redolada de la cuenca onde terminen.Y entrín y non, los daños ambientales yá tán fechos. Una degradación de la nuesa redolada natural, ca vuelta más peligrosa, qu’asocede por culpa de la neglixencia y la tolerancia de les autoridaes responsables de curialo”.
Llucía F. Marqués
This work is licensed under a Creative Commons Attribution 4.0 International License.