Bonos díes, bona xente.
” Subida de les temperatures antes del role de vientu”
Alborecemos col cielu mui nuboso y dalguna gotera nes zones espuestes al vientu ábrigu con unes temperatures que tan alrodiu de los 10ºC, rexistrándose nel puirtu payares -0,5ºC.
Güei vamos tener una primera parte del día seliquina, sicasí l’aire ábrigu que precede a la borrasca va soplar con fuercia en zones altes ya en puntos del llitoral. El cielu va tar mui nuboso pero con apertura de dellos claros o abancios nes hores centrales del día. Al escurecer cuando role l’aire a componente norte la nubosidá va dir n’aumentu y mos dexará precipitaciones xeneralizaes que sedrán mui abondoses al finar el día. Les temperatures subirán por mor del vientu ábrigu pero una vegada que role baxarán moderadamente de nuevu pa dexanos nevaes copioses na cordelera. Na rolada vamos tener vientu racheados mui fuertes y la mar seguirá mui brava. Muncho precuru porque esti prósimu riscar va xuntase les marees vives más potentes del añu, mui mala mar y precipitaciones importantes, coctel perfeutu pa que entre la mar tierra dientru nes zones favoretibles.
Mañana xueves vamos tener xarabatos frecuentes que sedrán más intensos y persistentes en zones de montaña, sobre too de la fastera oriental onde nevará copiosamente perriba de los 900-1000m. L’aire dirá amenorgando anque tovía van quedar raches mui fuertes en zones altes ya en puntos del llitoral con unes temperatures en descensu.
El vienres meyorará y veremos el sol con ambiente ivernal y paez que la fin de selmana tendremos dalgo más de nubosidá porque va colase una bolsa d’aire fríu n’altor que inestabilizará dalgo l’atmósfera, faciendo que se desendolque dalguna nube pero sin más consecuencies con unes temperatures mínimes en descensu y xelaes nes zones favoretibles y puertos de montaña.
Pa más alantre se tan poniendo los modelos meteorolóxicos interesantes pa los que mos presta’l fríu n’iviernu, podría establecese un enllaz d’altes presiones que mos apurrierá vientu continental fríu pero esto yá lu diremos viendo.
Que paséis un bon miércoles collacies ya collacios.
Semeya que mos l’apurre la nuesa collacia Conchi García Capllonch dende Arnáu.
This work is licensed under a Creative Commons Attribution 4.0 International License.